Thai-Cambodian ramri-ah buaina thar chhuak leh

Thai-Cambodian ramri-ah buaina thar chhuak leh
Thai police-ten Nilaini khan ramria an buaina hmunah Cambodian civil mite tear gas leh thelret silaimuin an kap niin ram pahnih thuneituten an sawi a, July thlaa ni nga chhung an indo hnua inkahhai an puan hnua an buaina lian ber a ni leh mek.
Cambodian thuneitute chuan an mi 23 velin hliam an tuar tih an sawi a. Thailand-a sipaite pawhin Thai thuneitute eng emaw zatin hliam an tuar ve bawk tih a sawi.
Buaina chhuahna hi Thailand-in an ram chin nia an sawi, Sa Kaeo province-a Ban Nong Ya Kaew khuaah a ni a. He hmun tho hi Cambodia pawhin an ramah chhal ve thovin Bantheay Meanchey province-a Prey Chan khua an ti.
Thai thuneitute hian thla hmasa khan heng lai hmun hi thirhlingnei hmangin an hung a, hei hi ram pahniha ramri hnaiha cheng tam takte chuan duh lo hle.
Thailand leh Cambodia hi France-in Cambodia a awp laiin, kum 1907 khan ramri a then a, khawmualah km 817-a thui inriin kum za chuang ramri-ah hian an intibuai tawh.
July thla khan ramriah nasa taka buaina a chhuak a, hei hi kum tam tak hnuah inthenawm ram intihbuaina lian ber niin mi 48 vel thi an awm a, mi sang telin an in leh lo an chhuahsan phah bawk.
July 28-ah ram pahnihte hian Malaysia-ah inkahhai inremna an siam a, hemi hnuah hian buaina a awm zui lo.
Nilaini khan Cambodian Information Minister Neth Pheaktra-a chuan Thai thuneituten ramri-ah hian dai loh tur chin an dai niin a sawi a, ‘tear gas, thelret silaimu leh bengchheng nasa tak siam thei hmangin Cambodian civil mite an bei’ niin a sawi.
Thailand-in tharum a hman hi Cambodian 200 velin lo bawh buaia lung leh thil dang, sairawkherh hmanga an lo beih a, Thai thuneitu eng emaw zatin hliam an tuar tih Thai sipaiten an sawi ve bawk.