Thailand laka tlawm India
Nilaini khan Pathum Thani, Thailand-ah India chuan mualneitu team Thailand chu international friendly match a khelhpui a, world number 99-na Thai-ho lakah Mizo player pathum telna Indian football team hi si hnih faiin an tlawm.
Asian Cup qualifying round match pawimawh tak an khelh tur atana inbuatsaih kal mek India hian Thailand an khelh hnuhnung pahnihah hnehna an chang ve ve a, mahse, tuntum hian Thai-ho kha team tha zawk an ni chuang a, chak zawk nih phuin an khel.
Benjamin Davis chuan tan atanga minute riatna lekah mualneitu team hmahruaina goal khungin, second half tir lam minute 59-ah Poramet Arjvilai chuan Thailand goal hnihna leh 2-0-a an chakna goal ni nghal a thawh ve leh a, Thammasat Stadium-ah home team kha kawng engkimah an chungnung zawk.
World number 127-na India tan captain Sunil Chhetri chuan tlarhma luah lehin, minute 24-naah mikhual si phurh sut theihna hun remchang hmu mah se a ball tauh chhe lo tak chu Thailand goalkeeper Saranon Anui chuan dive chungin a dansak hlauh.
Delhi tuiliak Chhetri hian 2019 AFC Asian Cup-a 4-1-a Thailand an hneh tum khan goal hnih a khung a, tuntum erawh a hlawhtling zo ta lo.
Kum 2019 vek khan Kings Cup lamah India hian si khat faiin Thailand hi an lo hneh tawh bawk.
Tarlan tawh thin angin, Nilaini international friendly match kha June ni 10 AFC Asian Cup qualifying round match-a Kowloon khawpuia Hong Kong an hmachhawn tur inbuatsaihna niin, Thailand tan pawh AFC Asian Cup final round qualifier-a Turkmenistan an sut tur inbuatsaihna a ni ve nghal bawk.
Thailand laka tlawm India
Get real time updates directly on you device, subscribe now.
Next Post