Thalai zingah ril cancer a pung

Colon (ril timai ila) cancer hi kum upa lama a tam thin a, mahse, tunah chuan kum lama naupang deuh zawk zingah pawh ril cancer a pung ta hle niin mithiam ten an sawi. Colon cancer hi kan kum a lo tam telh telhin a risk a sang tual tual tih chu a la dik zel tho a, chutihrualin thalai zawk zingah pawh he natna hi a tam ta riau a, BJS a zirchianna an tihchhuah tharah chuan 1950s a piang te aiin 1990 hnulama piang ten colon cancer neih theihna risk hi a letin an nei sang tawh zawk niin an tarlang.
Florida, USA-a gastroenterologust, Dr. Joseph Salhab chuan puitling, kum lama la upa vak si lo te zinga colon cancer tam ta riau mai chu ngaihven ngai tak ni a a hriat thu a sawi a, mahni dinhmun kan inhriatchian a pawimawh tiin, hriatchhuah hmaa inenkawlna dawn hma chu damchhuah lehna chance tisangtu a nih avangin colon cancer warning sign kan hriat a pawimawh niin a sawi.
Inthiar zawnga thisen chhuak: Dr. Salhab chuan inthiar laia thisen chhuak a awm chuan colon cancer vang a ni theih avangin doctor rawn thuai tur a ti a. Kan ek-ah thisen a tel emaw, inthiar zawha kan intihfaina toilet paper-ah thisen a kai emaw a nih chuan ngaihthah mai loh tur a ni. Thisen chu a sen duk emaw, a sen lar emaw pawh a ni thei. Chutihrualin, inthiar laia thisen chhuak zawng zawng hi colon cancer vang a ni vek kher lo a, a tam zawk chu haemorrhoids (piles) vang te pawh a ni thei. Mahse, kan dinhmun hriatchian nan doctor rawn thuai tur a ni.
A chhan hriat tur awm lo a pum na leh ringawt thin: Pum a nat fo chuan ngaihthah loh tur a ni. I han ngaihtuah vang vang a, “Chuvang chu a ni thei ang a,” tih tur awm chuang si lo a i pum a na fo a, a nat dan lah chu a na viau a nih bawk si chuan doctor rawn ngei tur a ni. Ei leh in bakah lifestyle kan thlak chung pawha pumna kan la nei fo thin a nih chuan ngaihthah loh tur a ni. A nat danah hian rawn na deuh thut, na deuh tak ang te a ni thei a, pum sek tideuh teng tung ang te pawh a ni thei a, pum puar deuh ul anga inhriatna te pawh a awm thei.
Taksa chau leh zawi: A chhan hriat tur awm si lo a i chau deuh ngawih ngawih reng mai a nih chuan ngaih tihthat lohna tur chi a ni. I awm hahdam deuh vang vang chung pawha i chau leh zawi riau reng tho a nih chuan eng emaw dik lo a awm tihna a ni a, ngaihthah loh tur a ni.
I inthiar danah danglam a awm em?: I inthiar thin dana thil danglam a awm em? I inthiar zin dan te pawh a lo danglam thei a, khawthalo reh hleithei lo te pawh a ni thei a, ek khal vak te pawh a ni thei. A hmaa kan la neih ngai loh, kan inthiar dana thil danglam a awm chuan ngaihthah loh tur a ni.
Dr. Salhab chuan colon cancer lanchhuah hmasak dan thildang hriat tel atana pawimawh a tih zingaha chhan hriattur awm si lo a rihna tlahniam ringawt te, chaw ei tui lo ringawt te, zan mutnaa thlan tla vak thin te leh a khat tawka khawsik leh ser ser ringawt thin te pawh natna dang vang a nih theih rualin colon cancer vang pawh a nih theih avangin doctor rawn a pawimawh a tih thu a sawi bawk.
Dr. Salhab chuan, “Kum 50 hnuailam zingah pawh khawvel huapin GI cancer hi a tam chak le mai a, inhriatchhuah hmaa enkawlna dawn vat hi damna chance tisangtu a nih avangin mahni kan inchian a pawimawh hle a ni,” a ti.