Lalchhuanliana Hmar
-- Advertisement --
Tun hi thalaite khawvel a ni tawh, tih thu hi hman atanga kan sawi rik fo a ni a. Hei hian thalaite chu englai pawhin ram leh khawtlang tan an pawimawh reng a ni tih a entir awm e. Kohhran thleng hian thalaite an chak chuan awmzia a nei a, Politicsah leh pawl hrang hrangah pawh thalaite chetzia hian pawl chak leh chak loh a hril thui hle a ni.thalaite chu an tha a chak ang bawkin an rilru leh ngaihtuahna pawh a chaka, khawtlang leh ram tan an tangkai em em a ni. thalaite hi kan ram hruaitu turte an nih thu kan sawi fo thin hi thudik a ni a, chuvang chuan mawhphurhna pe hma ila an tangkaina hi chhungkua, ram leh khawtlangin a chhawr hma mai dawn a lo ni. Mizote hian tunlai hunah hian thalaite hi kan ring ngam harin nu leh pate hian kan awp bet rei mah mah tawh niin a lang ta e.
Mizote hi kan lo changkang ve tial tial a, thalaite kan ngaihdan pawh khawvel changkanna mila kan her rem thiam a hun tawh ang. Tunlai thalaite hian thiamna thang zel hmangin khawvel zau zawk an hmu phak tawha, an rualawt a, mahni kut kea din tum hi an awm fur tawh a ni. Kan state hi kan la pachhe deuhin kan thalaite innghahna ber sawrkar hna hian min daih seng tawh si lo va, hmun ruak (vacancy) tak ngial pawh kan hnawh khat thei si lo va, kawng dang dap thiam a tul tawh hle mai. Eizawnna bulfuk dang leh innghahna tlak Indudtry leh thil dang kan la neih si loh avangin India ram pawn thlengin thalaite an in zar pharh ve tawh a ni.Kan sawrkarin thalai lehkha thiam bik tlemte tana Super IAS tur a chher mek hi thil tha tak a nih rualin, thalai tam zawkte hi a ngaihtuah tel a pawimawh a, lehkha zir sang kher lote eizawnna thlenga a ngaihtuahsak a tul hle a ni.
Tun hnaiah social media leh chanchinbu lamah mizo thalai ram danga hnathawk harsatna tawk an awm thute thlengin kan hre ta. Mizoramah heng thalaite thawn chhuak theitu nia insawi Agency 42 awmin chungte chuan ram pawna thawn chhuahna Licence an neih loh vek thute, Passport lem hmanga kalte leh an chhungte hriat loha kal thlengin an awm tih kan hmu a, min barakhaih hle a ni. Hemi kawngah hian Lalremsangi Fanai leh Zela Ralte,UAE a hnathawk mekte hmalaknain mi sawm zet chu chhan chhuah niin an rawn thawn haw tawh tih kan hmu bawk a,an fakawm hle mai. Sum duh luat vanga hmun him leh him lo pawh ngaihtuah lo leka kan fate kan thawn chhuak a nih chuan, kan fate aiin tangka sum kan hmangaih zawk tihna a ni a, hnam ang pawha mualpho theihna a ni. He thil hian sawrkar beng pawh a thleng tawh niin a lang a, thil dik lo titu an awm a nih chuan dan lek kawh ngei chi a ni ang a, dan hian a kawng hi zawh hram teh se. Kan ram hruaitute hian thalaite lam an hawi a, thalai hna nei lote tana kawng zawn sak hi an nun kaihruaitu atan thleng pawha thil tul tak a ni.
|HALAI OFFICER RINTLAK AN TAM:
Mizoram Civil Services Combined Exam., Engenier leh Technical lama hlawhtlingte hi zir chiang ta ila, an naupan lai atanga nu leh pa thuawi tak, K|P, |KP, PYD etc.member tha tak leh Pathian tih mi hi an tam ber a rinawm. Zonet TV lama hetiang mi hlawhtling ho an chawmawi leh fuih thinte hi mi fel leh chhungkaw pangngai tak atanga chhuak an tam thin a ni. Chutiang ang mite chuan hlemhletna rilru pu chungin sawrkar hna thawh an tum ngawt lo vang. A pawimawh ta chu an bul tanna theuha an hotute kha an ni ang, dik taka bul an lo tanpui chuan an dik mai ang a, dik lo taka bul an lo tanpui erawh chuan an kal dik lo nghal mai dawn a ni. A bul tan that chu a chanve zo tluk a ni tih thufing kha a pawimawh hle awm e. A pawimawh ber erawh chu ram hruaitu lu ber a ni reng fo.
Kan sawrkar Officers zingah hian eiru duh lo tak tak hi an awm teuh a, mahse thuneitu sang lam thupek avanga thil dik lo pawh dik anga kaltir a ngaih thin vanga hrehawm ti hi an awm thu sawi a ni thin. A bik takin Works departmenta thawkte leh CSS lam khawihtute hian pawisa hman si loh, hmang anga lantirna (utilisation certificate) pek chhuah ngai thin ang te hi hrehawm an tih thu sawi a awm a, thil dang tam tak pawh a awm ang. Sawrkar hna thawh dan kalphung pawh hi her rem hreta tha zawk tur hi awmin a lang a, thawh hona tichhe thei khawpa hmun khata awm rei lutuk, ram tan aia anmahni tana hna thiam zawkte pawh hi a awm theih awm asin! Dan tha tak tak kan neih reng laia Sawrkar hnathawk hausa, tih awm thinte pawh hi kalphung dik tawk loh vang a ni thei ang.
Ram hruaitu lu ber hian dikna nen hma han hruai ngat se, a hna thawktute chu an dik lo ngam lo mai ang. Sawrkar hruaitu lu ber a corrupt loha, corruption a huat tak tak ngat chuan a hnuaia mite tan han corrupt ngamna chi a ni lo ang. Kan ram hruaitu thenkhatte hi chu ram tan aia anmahni tana thahnemngai nia ngaih theih khawpa hausa chak an ni nual tawh an ti fo mai. Ram hruaitu corrupt deuhte hi chuan insiam that an tum lo a nih chuan thangthar kut la fai hote tan an hmun hi kian mai se, chu chu ram tana an tangkai zawkna a ni awm e. Sawrkar officers senior zawkte pawh hian mawhphurhna sang tak an nei a, sawrkar kal dik lo tur ven leh officers tharte kawng dik kawhhmuh hi an kutah thui tak a awm a ni. Kan sakhaw zirtirna mil hian dik tak leh huai takin ram tan hna han thawk teh se, mipui tam zawk hi an hnungah kan awm e. Thil dik lo tih hriat reng pawha ‘Yes sir’ ti ngawt zel aiin ‘No sir’ ti ngam Officer hi kan ram mamawh a ni e.
|halai mithiam, ram vei tak tak leh rintlak hi an tam tawh a, heng mite hi Kohhran leh khawtlangah pawh an tangkai hle zel a ni. Hruaitu rintlak hnuaiah chuan kan thalaite hian ram rorelna thlengin hmasawnna tha zawk hi min thlenpui thei ang tih hi a beisei ngamin ka hria.