Thalaite tana hma lakpui turin Union MoS an ngen

Mizoram Youth Commission chairman Malsawmzuala Ralte leh OSD to CM Jonathan Lalremruata te chuan Thawhtanni khan Union minister of state for Minority Affairs John Barla chu a chenna in Delhi-ah an kawm.
MYC chairman chuan Mizo thalaite tana hma an lakna hrang hrang hrilhin, minister chu a theih anga a portfolio atanga tanpuina dappui turin a ngen. Union MoS hian a secretary Mithunyadav nena hmalak theihna sawiho tura a rawn angin, an sawiho nghal.
PMJVK scheme kaltlanga hmalak theihna hrang hrang awmte kawhhmuhin, chief minister Lalduhoma leh District Council & Minority Affairs minister C Lalsawivunga te biak nghal an ni a; 2nd instalment dawn tur leh project thehluh tawh nawr chhuak tura an rawn angin hma lak nghal a ni.
PMJVK scheme guidelines hian Mizoram pumpui a huam thei tawh dawn a. Heng – health, sports, education, agriculture, market etc. ah hmalakna hrang hrang, thalaite tana hmasawnna tur kawng tam tak a awm thei dawn tih sawi a ni.