Tharum thawh a tam vangin Peru khawpuiah emergency puang

Tharum thawh a tam vangin Peru khawpuiah emergency puang
Peru sorkar chuan an khawpuiah tun hnaia tharum thawhna leh dan bawhchhiatna a tam lutuk avangin emergency an puang.
President Dina Boluarte-i kaihhruaiin emergency a puanah hian Thawhtanni zan atang khan Lima kawtthlerah sipai an duty tan nghal a. Police leh sipaite chuan ni 30 lo awm tur chhungin mi man mai theihna an nei dawn a, hei hi tun hnaia zai thiam lar tak thahna thleng atana intan a ni.
Emergency puan hma hian tun hnaiah mi sual pawlten tharum thawhin sumdawnna an bei a, inkalpawhna buaipuitu company pawh an bei a. Gang man an nih pawhin thuneitute an bei let nasa thei hle.
Cumbia singer hriat hlawh, Paul Flores chu Pathianni khan a chuanna bus beih niin thah a ni.
He thil thlen hnuah hian thingpui dawrah bomb tihpuah zui niin mi 11 velin hliam an tuar leh bawk.
Peru-ah hian tun hnaiah inthahna, tharum nena mi thil chhuh leh vantlang hmun beihna a tam hle a. Police chuan January 1 leh March 16 inkarah inthahna vawi 459 a thleng a, January-ah ringawt pawh mi thil chhuh luihna vawi 1,909 a thleng tih an sawi.
Dan bawhchhiatna thleng tam lutuk avang hian September leh December thlaa emergency lo puang tawh, Boluarte-i sorkar chuan a puang leh ta a, tualthattute chu thi tura hremna thlengin an tuar dawn tih a sawi nghal a. Peru-ah hian ram phatsantute chauh thi tura hremna dan a awm.
Eptute chuan Interior Minister Juan Jose Santivanez-a rintawk lohna put luh an tum a, tharum thawhna thleng hmet mit tura ruahmanna nei lovah an puh.
Bukna hi tun kar tawpah Congress thutkhawmah sawiho a ni ang.
Peruvian thuneitute hian tun hnai kum eng emaw ti chhung hian pawi khawihna leh vantlang buaina a chhuah nasatin emergency an lo puang fo tawh thin.
Emergency puan lai hian pun khawm leh veivahna thunun a ni a, police leh sipaiten court thupek nghak kher lovin mi an man thei bawk.