Ukraine-a energy inbeihsak lo turin Trump-Putin inrem

Ukraine-a energy inbeihsak lo turin Trump-Putin inrem
President Vladimir Putin-a chuan Ukraine-a inkahhai puan vek chu a duh lo va, energy hmun beih erawh tihtawp a duh tih US President Donald Trump nen an inbiaknaah a sawi.
Russian hruaitu hian Trump-a team-in Saudi Arabia-a Ukrainian-te nena thla khat chhung inkahhai an puan an rawt chu a hnawl.
Inremna tak tak chu ram dangten sipai hmanrua leh thuruk hrilha Ukraine an puihna a tawp hunah chauh a theih dawn tih a sawi a. A hmain Ukraine-in a thawhpui European-te chuan hei hi chu a theih rih loh tih an sawi.
US hian Pathianniah Jeddah, Saudi Arabia-ah Ukraine a be leh dawn tih US Middle East palai, Steve Witkoff chuan a sawi.
Kum thum chhung indo tawhah hian tun hnaiah Russia hian thla ruk kal taa Ukrainian sipaiten an chhuhsak, Kursk region hmun tam tak a laksak leh tawh.
Thawhlehni zana Trump-Putin inbiaknaah hian inremna a awm theih nan Middle East-a inbiak chhunzawm zel chu tha an ti ve ve.
US palaiten kar kal ta Thawhlehnia Jeddah-a Ukrainian palaite an kawm khan Kyiv hi ni 30 chhung khawmual, boruak leh tuipuiah inkahhai puang turin an remtihtir.
Trump-a leh Putin-a inbiak zawh hnu lawka Helsinki, Finland thleng, President Volodymyr Zelensky chuan Ukraine chuan energy hmun inbeihsak loh chu tha a tih thu a sawi a, chutihrual chuan a kimchang hriat an duh hmasa tih a sawi.
A hnuah Putin-a hian Russia-in drone hmanga nasa taka an ram beih a nih laiin inkahhai a hnawl niin a sawi.
An beih zingah Sumy-a damdawi in leh Slovyansk-a power supply pekna pawh a tel tih Ukrainian hruaitu hian a sawi.
Trump-a hian Russian hruaitu nena an inbiakna chu ‘a thain a hlawk’ tih a sawi a. “Energy leh infrastructure beih chu titawp nghal vek turin kan inrem a, inkahhai tak tak kalpui turin kan kal zel ang a, Russia leh Ukraine indona hi tihtawp a ni ang,” tiin Truth Social-ah a tar lang.
September khan Zelensky-a chuan Ukraine-a an energy hmun 80% chu Russia-in an bomb chhe tawh niin a lo sawi tawh a. Kyiv pawhin Russia-a tuialhthei leh boruakalhthei hmunte chu drone leh missile hmangin a bei ve bawk.
Hruaitu pahnihte an inbiak zawh White House thuchhuah chuan Kyiv-a inremna siam an tar lang lo va. Trump leh Putin te hian ‘energy leh infrastructure inkahhai’ an pawm phawt a. Hei hi ‘Black Sea-a inkahhai, inkahhai vek leh muanna tak tak’ a awm theih nan’ an indawr zel dawn tih an tar lang.