Thawhho thiam a pawimawh

Manipur buainaah a tuartu ber Zo hnahthlakte an nih miau avangin ralkhat atanga ngawi renga lo thlir liam mai theih a ni lo va. He buaina hi a reh theih nan te, Manipura Zofaten dinhmun tha an neih nan te, buaina tawkte chhawmdawl nan te, Mizoram sawrkar leh mipui bakah ram hrang hranga Zo fa ten, theih ang angin mahni zawn theuhah thahnemngai takin hma kan la tlang mek a. Hetih lai hian, thawhhona kawngah thu inhmu tlang leh pheikhai rual deuh zawka hmalak dan kan zawn hram hram a pawimawh dawn hle tih a lang.
Mizoram chhungah NGO Coordination Committee a ding a, chu chuan ram leh hnam hnuk khawih thilah pheikhai rual taka sawt zawka hma lak a nih theih nan uluk taka ngaihtuahna seng chungin sarkar nen hma an lo la tawh thin a; ramri issue-a Vairengtea buaina chhuak chungchangah pawh khan sawrkar nen thawhhona tha tak neih a lo ni tawh a.
Tun tuma Manipur buai avanga Manipura Zo hnahthlakte thlavang hauhna kawngah pawh hian, pawl hrang hrang leh political party hrang hrangin thuchhuah kan nei thin a, hei hi thahnemngaihna zawnah tihawm tak pawh a ni. Hetih lai hian, hnung lama mit nei ran chunga thu leh hla kan neih thiam a pawimawh dawn ta niin a lang. Hetiang issue, thil pawi thlen awlsam theih (sensitive) hunah hi chuan, NGO Coordination Committee leh sawrkar pawh hian thil pawihai thleng thei tur an monitor zung zung theih a pawimawh a, chutiang bawkin, pawl hrang hrangte pawhin mahni thua kawh chhuak ngawt lova, thuneitute mitmei veng chunga chet lak thiam a pawimawh dawn a ni.
Thufing chuan, ‘Beih hmain ngun taka râl rêl a tha, rem i hriat poh leh i chak zâwk ang’ a ti a. Chumi awmzia chu, ral beihnaah thawm tih rin a, haw haw chunga hma lam tawng pawng bawh ruak ruak ringawt hi a pawi thei hle tih a entir a. Tun thil thleng mekah pawh hian, rilru fim pu hman lova tawng pawng bawh ruak ruak mai a tha dawn lo tih a lang a. Hma chu kan la ang; chutih laiin, a lehlamin ‘ka mei rap se, chu ila’ tih rilru pu ranin chet an la mek tih hriat a pawimawh khawp ang le. Football khelh laia hnung amiten a ruka min piai fo chuan, red card emaw, yellow card emaw hmuh phahna khawpa chet lak let ve mai a awl thin ang deuh tho hi a ni. Min dah offside tum rana chet lakna hmu thiam lo leka tlan pur pur hi a hlauhawm thei dawnin a lang.