Thawhlehni-ah Session tan dawn Speaker atana hming pe la awm lo

Mizoram state legislative assembly pakuanaa member tur (MLA) thlan fel a ni a, he term thara Session hmasa ber chu Thawhtanni hian neih a ni dawn.
Session hmasa ber hi ni thum awh tur a ni a, Assembly speaker thlan chu an tih tur pawimawh a ni. Protem speaker-in a kaihruai ang a, speaker tur hi protem speaker kaihhruaiin thlan a ni ang.
Assembly secretariat hotute hnen atanga thu dawn danin, Speaker thlanna atan hian December ni 11, Thawhtanni tlai dar 3:30 thleng hming a pek theih a, mahse Speaker chuh tura hming pe lut an la awm lo.
Thil nihphung pangngai angin member ngah ber ZPM te vawrh chhuah an tling turah ngaih a ni a, ZPM hian chawlhkar liam taah khan speaker tur hi an thlang fel chiah lo nia hriat a ni.
Assembly pakuana session hmasa ber hi Thawhlehni chawhma dar 10:30-ah an tan ang a, protem speaker Lalfamkima’n kaihruaiin, member thlan tharte rinawmna thu a tiamtir ang a, assembly member atan lak luh an ni ang a, chumi hnuah Speaker tur thlan a ni ang.
A tuk Nilainiah session hi neih chhunzawm leh a ni ang a, dan pangngaiin Governor Dr Hari Babu Kambhampati-a’n house ah thu a sawi ang.
Session ni tawp ber hun hmasa lamah session hmasa leh tun session inkara MLA boral sunna hun hman a ni ang a, chumi hnuah deputy speaker tur thlanna neih leh a ni ang.