Thawktu indaihlohna leh khawl lama mamawh kan phuhru zel – Health minister
Thawktu indaihlohna leh khawl
lama mamawh kan phuhru zel
– Health minister
Damdawi in hrang hranga thawktu indaihlohna leh khawl lam mamawhna chu theih ang angin a tahtawla phuhruk chhoh zel a ni tih Health minister Lalrinpuii chuan a sawi.
Ningania ZPM office Lungleia inkhawmah ZPM hruaitu Lalrinpuii hian sawrkar anga hriselna lama hma an lakna a sawi a. Kum khat emaw lek chhungin, Lunglei mipuiin mamawh em em ENT doctor leh lung doctor chu Lunglei Civil Hospital-ah an dah a. Tunah medicine specialist thar leh gyneacologist thar an dah tawh bawk tih a sawi.
Siaha lamah hnimhlum doctor an neih loh pawh an dah thar a, an mamawh thil tam tak a hmuna enin hma an lakpui zel dawn tih a sawi a. Thingtlang lama thawktu indaihlohna a theih ang angin post ruak za dawn hnawhkhah a ni a, theihtawp chhuah zel a ni tih a sawi bawk.
“Tunah hian health worker lak theihna tura hmalakna a hlawhtling a, health worker 100 lak thar tum niin, thingtlang lama indaihlohna hnawhkhah theih beisei a ni,” a ti.
Health minister chuan National Health Mission atangin doctor 39 lak a ni a. Primary Health Centre, Community Health Centre leh Upper PHC bakah District Hospital-a indaihlohnaah dahkhah tawh a ni a.Doctor post graduate zira kal an awm leh tak avangin hma lak chhunzawm zel turin ruahmanna siam a ni tih a sawi.
CT Scan la neilo District Hospital-te tan hma lak a nih bakah ultra-sound leh x-ray khawl la neilo tan hma lak niin, District Hospital tih changtlun a, specialist mamawh ang an dah chuan, Aizawl leh hmundang, phai pan fote a ngai tawh lo anga, chumi tur chuan theihtawp an chhuah tih a sawi a ni.
Natna khirh bik enkawlna lamah tan an la tih Lalrinpuii hian sawiin, “State Organ Tissue Transplant tihna turin bawhzui a ni a, kum khat hnuah establishment kan remfel a, a thawktu tur transplant coordinator, consultant leh thawktu dang hmuh an ni tawh a, operation theatre tur pawh tihfel a ni tawh a, license nghah mek a ni. Hei hi kan neih hun chuan phailam atangin mithiam an lokal anga, kal thlak ngaite pawh thlak theih a ni tawh anga, lung tha lo zai thlengin kan ti thei dawn a ni,” a ti. Tuna Aizawla private hospital-a lung zaithiamten an zaiin mi pakhat tan cheng nuai 9 velte sen a ngai a, ZMC-a an zai theih hun chuan cheng nuai 1 leh sing 5 vela zai theih a ni dawn tih sawiin, healthcare scheme-a inzkalut tan phei chuan a bill theioh dawn tih a sawi.