Thawnchhuah zahpui awm loh sawhthing fai leh tha kan beisei – Agriculture minister

On Mar 3, 2025 15 0

Thawnchhuah zahpui awm loh
sawhthing fai leh tha kan beisei
– Agriculture minister
Sawrkarin state pawna thawnchhuah zahpui awm loh leh sawhthing fai leh tha a beisei tih Mizoram Agriculture Marketing Board (MAMB) chairman, minister PC Vanlalruara chuan a sawi.
Mission Foundation Movement chuan Inrinni Sihphir Kawnvengah Sihphir, Lungdai leh Durtlanga Mizoram Iskut Grower Association hnenah iskut enkawlna atana hman tur leitha a sem a. Hmanpuitu Agriculture minister, MAMB chairman PC Vanlalruata chuan, sawrkarin thlai thar lilamna tur platform siam a tum a, market platform an siam hunah chuan tunhmaa loneitute harsatna thin kha sutkian a nih thuai an beisei tih a sawi.
“Tunah hian sawhthing hi Vairam lamah kg.ah Rs.25, Rs.30 te a ni a, sawrkarin kuthnathawktute a lo tiam tawh avangin support price hmangin kg. ah Rs.50-in kan laksak mek a ni. Hetihrual hian a vawikhatna a nih avangin tlema lo buarchuar deuh a awm maithei a, kan farmer-te pawh an lo la inpeih lo deuh aniang, sawhthing bal leh ningnel deuh a la awm a ni. Vairam lama thawnchhuah zahpui awm loh sawhthing fai leh tha tak kuthnathawktute atangin hmuh kan inbeisei a ni,” a ti.
Sihphir, Lungdai leh Durtlang-in iskut tam tak tharchhuakin, chhungkaw tam tak eizawnna a lo ni tawh thin a, Mizoram bakah ram pawn thleng pawha thawn chhuah thin minister hian a ni tih a sawi a. Kum 10 vel kalta atang khan iskut thar chhuah a tlem tial tial a, tunah phei chuan tih tham thar chhuah a awm ta meuh lo tih sawiin, “Isktut thar a tlem chhan hrang hrang zirchiang tura ke pen an awm hi a lawmawm a, iskut chingtute tan beiseina thar a pek ngei ka beisei,” a ti. Iskut pawh kan thar chho zel a nih chuan market fel leh system felfai taka luhpui an tum dawn tih a sawi a; farmer tan tharchhuaktu nih bakah a hralhna (market) buaipuitu an ni kawp hi a hna hnihin a hautak a, farmer-te thar chhuah sa sawrkarin a buaipui ngai lo thin a, tun sawrkar chuan thlai thar lilam tur platform an siam ta tih a sawi a ni.
Leitha hi iskut chingtu chhungkaw 60 hnenah sem a ni a, he project hi Ministry of Tribal Affairs hnuaia Support to Tribal Research Institute fund niin, Mizoram Social Welfare & Tribal Affairs Department kaltlanga thawh a ni. Tunhnai kum engemawzat atang khan Sihphir leh a chhehvela iskut tharchhuah a tlem sawt hle a, he research project hnuaiah hian iskut chingtute dinhmun leh hma an lak mekna bakah harsatna an tawh hrang hrang zirchian a ni.