Thei hrisel theihai
Thei hrisel theihai
Theihai thatna kan rawn ziak tawh a, a dang kan rawn tarlang leh e. Theihai hi ‘king of fruits’ ti te pawhin an sawi thin a, a tuina mai piah lamah taksa hrisel nan pawh thatna a lo ngah khawp mai. Times of India health section-in theihai hriselna leh thatna an sawi te hi hre reng chungin ei rawh le.
1. Theihai-ah chuan antioxidant thenkhat quercetin, isoquercitrin, astragalin, fisetin, gallic acid leh methylgallat te a tam a, chu chuan ril, hnute, thisen leh mipa serh cancer tur a veng thei.
2. Vitamin C a pai hnem a, pectin leh fibre a pai hnem bawk a, chu chuan cholesterol level a tihniam thei.
3. Vun kua inhawh tur a veng thei a, vun a tilang fresh thei. Theihai chu vun mawm leh mawm lo, vun sensitive deuh tan pawh a tha vek.
4. Tartcric acid, malic acid leh citric acid te a pai a, chu chuan kan taksain alkali reserve a neih te a siam tha.
5. Vitamin leh nutrient a pai hnem avangin mi a tipuar rei a, kan taksain chaw a paitawih theihna a tanpui a, calorie a eiral thei bawk a, chuvangin intih cher nan pawh a tha hle.
6. A rah mai bakah theihai hnah pawh a tha khawp mai. Diabetes neite tan theihnah 5-6 vel chhum hmin a, zankhuaa a chhumna tui nena chiah a, a tuka a tui in hian insulin level a siamtha thei. Theihai-ah hian glycemic index chu (41-60) chauh a nih avangin kan eitam lutuk te a nih loh chuan sugar level a tisang chuang lo.
7. Mipa mipatna tichak thei a ni a, ‘love fruit’ ti te pawhin an sawi thin.
8. Vitamin A a pai hnem a, theihai chan sawm no khat ei hian nitina vitamin A kan mamawh zat 25% kan ei nghal tihna a ni. Mit tan a tha hle a, khaw hmuh a tifiahin, mit khawro tur a veng a, night blindness te pawh a veng thei.
9. Enzyme a pai hnem a, chu chuan chaw paitawihna kawngah digestive system a tanpui.
10. Heat stroke lakah min veng thei. Ni sa hnuaia i awm emaw, khaw lum lutukah khan theihnai chu juicer-ah sawr la, tui tlem pawlh la, khawizu thirfiante khat vel nen chawk la, in rawh. Chu chuan i taksa a vawng dai sawng sawng ang a, heat stroke lakah pawh mi a veng thei.
11. Vitamin C leh A a pai hnem a, chu bakah carotenoids chi hrang hrang 25 vel a pai bawk a, chung zawng zawng han thawk ho vel chuan kan taksain natna a do let theihna an tichak thei.
12. Theihai chu rawt diak la, khawizu leh bawnghnute nen chawhpawlh a, chu chu body scrub angin hmang rawh. Hei hi vun tan a tha hle a, vun a ti nemin a ti no thei.
13. Ngaihtuahna sawrbing thei turin mi a tanpui thei. Naupang, an zirlai thiam thei lo deuh te kha theihai ei tir la, chu chuan an rilru sawrbing turin a tanpui thei. Theihaiah hian glutamine acid a awm a, chu chuan kan cell thi tur a veng a, thil kan chhinchhiah theihna a tichak thei.
14. Iron a pai hnem a, anemia nei tan a tha hle. Hmeichhe thi hul tawh te tan pawh theihai eihnem a pawi lo, an iron leh calcium level siamtha thei a ni tlat.