Thenzawl Peace City siamna atan master plan duang tur agency dap

Thenzawl Peace City siamna atan
master plan duang tur agency dap
Chief minister Lalduhoma hoin Nilaini khan Thenzawl Peace City Master Plan chungchang sawiho a ni a. UD&PA minister K Sapdanga, chief secretary Khilli Ram Meena leh a kaihhnawih sawrkar hotute an tel.
Chief minister chuan Thenzawlah tuihna tha tak tak a awm nual a, furah phei chuan chenna in a chim hial thin tih sawiin, master plan-ah khaw lailia lui mawi tak, dil nalh leh a chhehvel ram mawi tak awm tel tir turin a chah.
Sawrkar hmunhma, nakin zela la chhawr tangkai tur an ruahman a ngai tih a sawi a. Tlang rama plan city, mawi leh khualzin hip tak, chenna atana duhawm si ruahman ngei tum turin a chah bawk.
Thutkhawma report danin, tunah Thenzawlah hian mihring singkhat vel cheng anga ngaih a ni a. Ram square km.108 huamchhung velah plan hi siamin, urban area bik sq.km. 82 vel tura chhut ni ta se; mipui bit zawng hi hectare khatah mi 100 a nih chuan, mi nuai 10 vel thawl nuam taka khawsa thei tura ngaih a ni. A tul anga tih len zel theiha duan tum a ni.
Thenzawl Peace City hmalakna hi Aizawl khawpui tawt lutuk tihziaawmna leh Mizoram-in khawpui changkang zawk neih theihna tura chief minister Lalduhoma hmalakna a ni a. Mawhphurhna a lak tirh atangin sawrkar laipui thuneitute vawi engemawzat a sawipui tawh a ni.
8 Master plan atan hian sawrkar laipuia Ministry of Housing & Urban Affairs chuan Mizoram sawrkar hnenah cheng vaibelchhe 10 a phalsak a, a bul tanna atan vbch.1 a pechhuak tawh.
8 Plan siamtu tur agency thlanfel hunah zaa 25 a rawn pe leh ang. Draft detail project report thehluh hunah a dang zaa 35 a pe anga, final DPR thehluh hunah zaa 30 a pe leh dawn a ni.
8 CM hoa thukhawm hian agency rintlak leh hmingtha ngei thlan tum nise an tih bakah sawrkar atanga peace city buaipuitu tur bik special purpose vehicle din an rel.