Thenzawla Dragonfruit hmun
khualzin thlen theiha siam tum
Thenzawl ram, Lamlian Dung Zau Dragonfruit hmun chu khualzinmite an tlawh a, an thlen nghal theihnan ruahman tum a ni.
Ningania he hmun tlawhtu Horticulture minister Prof Lalnilawma hnena Zau neitute hrilh danin, he Zauah hian kuminah chhungkaw 48-in Dragonfruit quintal 557 an thar a. A thar hnem ber Gaby Zosangpuii chuan quintal 21 a thar. A rah hi thla 5 chhungin tum 9 a seng hman a ni. Heng chhungkaw 48, society-a telte hian Local Soda Pvt Ltd nen inremna thuthlung ziakin an tharchhuah hi an lo-ah kalchilhin an leisak thin.
He hmun hi chief minister pawhin a tlawh tawh a, tui lak leh a panna kawnga harsatna an neih chingfel turin ruahmanna a siam a ni. Mizoram Tourism department nen pawh an thawkdun tan mek a, khualzinmite tana tlawh theih turin ‘farm stay’ siam tum a ni.
Kuthnathawktute tana hma lak chu sawrkar auhla a ni a, theihtawp chhuaha kuthna thawktute tana tan lak zel an tum tih Prof Lalnilawma hian a sawi a. Thei sawngbawl lama an hmachhawp zingah Dragonfruit sawngbawl dan tur an zawng mek a, a powder ang zawnga siam an rilruk tih a sawi.
“Sawrkarin Zau (cluster) ang zawnga hma lak zel a tum a; Lamlian Dung Zauah pawh sawrkar department hrang hrang nen tanghoin hna thawh kan tum,” a ti a. Lamlian Dung Zau chu khalzin mite hiptu leh pan hlawh ala nih ngei a beisei tih a sawi bawk.
Rural Development minister ni bawk Prof Lalnilawma hian RD hnuaia hmalakna, Thenzawl Zote Road-a MGNREGA hnuaia hnathawh a hmunah a en nghal a ni.
Thenzawla Dragonfruit hmun khualzin thlen theiha siam tum
Get real time updates directly on you device, subscribe now.
Prev Post
Next Post