Thenzawlah PWD Division thar
Ruihhlo zuarte kan ngaithei lo
– Chief minister
Thalaite nun tihchhiat saktu ruihhlo zuarte sawrkarin a ngaithei loa, a enliam mai mai dawn lo tih chief minister Lalduhoma chuan a sawi.
Vantawng Group YMA chuan Zirtawpni khan Buangpuiah inkhawmpui vawi 26-na an hmang a. Chawhma hun hmanpuitu, bialtu MLA ni bawk Lalduhoma chuan ruihhlo do kawngah tha an thlah dawn lo tih sawiin, “Kan thalaite nun tihchhiat sak a, naupang te tea an boral pawh pawi ti map lo, ruihhlo zuarte hi kan ngai thei loa, kan enliam mai mai dawn lo,” a ti. Tunhnaia ruihhlo tam tham tak mantu sub inspector Zirthanga pawh a bia a, a thawhpuite nen chawimawina an hlan dawn tih a sawi.
Chief minister bial a nih vanga duhsakna ni chuang loin, a tulna vang zawkin Thenzawlah PWD Division dah thar tumin sawrkarin hma a la a, Vantawng khawhthlaah rope way siam thuai tum a ni tih chief minister hian a sawi a. Thenzawl damdawi inah ultrasound leh Serchhip damdawi inah dialysis khawl dah thar a ni dawn tih sawi bawk.
‘Muanna Khawpui’ (peace city), mipui nuai 10 vel chenna tur Thenzawl leh a chhehvela dinna atan Prime minister Narendra Modi hnena a dil chu an hmuh theih a rinawm zel tih a sawi a. 16th Finance Commission-ah pawh sawi a ni a, tunah hian Ministry of Housing and Urban Affairs chuan master plan siamna tur cheng vaibelchhe 10 a rawn phalsak a, hun erawh a la duh deuh dawn tih a sawi.
Sawrkarin ram hmasawnna ngaipawimawh mah se, mipui chhungril nun a chhiat si chuan hmasawnna tluantling ni theiin an hre lo tih Lalduhoma hian sawiin, “Moral reformation keng tel hmalakna kan kalpui nual tawh a, kan la kalpui zel dawn,” a ti.
Vantawng Group YMA-ah hian branch 13 an awm a, member 7523 an awm a ni.
Thenzawlah PWD Division thar Ruihhlo zuarte kan ngaithei lo – Chief minister
Get real time updates directly on you device, subscribe now.