“Thianpa” dang la rawn kal dawn
Union minister Kiren Rijiju a rawn kal a, a rawn kal dawn khan Mizoram chief minister-in “Ka thianpa a ni a,” tiin a sawi. He tawngkam hi a lar hle. A rawn kal hnuah BJP president Dr K Beichhua-a’n “Ka thianpa” tiin a sawi. Mi dang pawh an la rawn kal dawn.
Dr K Beichhua hian thusawi kualkhungna (double inverted comas) a hmang a, ka thianpa ti mai lovin “ka thianpa” tiin social media-ah a post. Thusawi kualkhungna a hmang hian awmzia a nei!
Kiren Rijiju hi a thianpa a nih thu Dr Beichhua hian a sawi a, “2014 atangin kan inkawm tawh,” a ti.
Dampa bial inthlana campaign turin Delhi atangin minister an la rawn kal dawn tih a sawi a, union minister Dr Jitendra Singh Rana, PMO enkawltu a rawn kal tur thu, October ni 29-ah a rawn kal tur thu te, Kristian minister George Kurien pawh November ni 6-ah a rawn kal tur thu te a sawi.
Tun hnaiah Nagalan deputy chief minister Yanthungo Patton chuan Reiek tlang dung a tlawh a, Tripura minister Santana Chakma-in Dampa bial a thut chilh mek tih a sawi bawk. Tripura MLA pahnih Babulal Chakma leh Reang MLA pakhat an rawn kal dawn tih a sawi a, DoNER minister pawh campaign-a a rawn kal an beisei a, mahse hei hi a la chiang lo tih pawh a sawi.
Dr Beichhua chuan hetia hmun dang atanga an rawn campaign hi an party-in an hlawkpui tih a sawi a, Rijiju khan, a pe theitu kan ni a, kan candidate in thlang tling a nih chuan in mamawh kan pe ang che u a ti a, chu chu bial mipuiin an ngaihtuah an beisei thu a sawi. Rijiju hian Delhi-a a haw hnuah pawh Dampa bial inthlan hi a rawn ngaihven zui a, phone-in a rawn zawt zui tih a sawi bawk.
An party candidate a tlin ngei an beisei thu a sawi a, “Kar hnih vel a la awm a, hemi chhung hian hma kan sawn zel kan beisei. Chuvangin kan tlin ngei kan beisei a, a pe theitute thusawi hi Dampa bial mipuite’n an ngaihtuah ang a, hma an sawn nan BJP an vote ang tih kan beisei,” a ti.
Campaign chhungin hma an sawn tih a sawi a, “Unite pawh khaw tinah kan nei tawh,” a ti. “A langsara lawmluh leh a lang lova lawmluh kan nei a, lang lova lawmluh hi an tam zawk ang,” a ti bawk.
Mizoram inthlanah BJP hi an tang telh telh niin a lang a, 2023 inthlanpuiah pawh khan inthlan boruak a awm tak tak hma pawhin minister pawimawhte’n hmun hrang hrang an tlawh ngun. Dampa bial inthlan lo awm tur pawh hi by-election ni mah se an tang hle.