Thiem-a tennis zinkawng tawp ve ta!

Thiem-a tennis zinkawng tawp ve ta!
Thawhlehni khan Vienna khawpuia a professional tennis match hnuhnungber ni taah Dominic Thiem chu straight-set hmangin Italy player Luciano Darderi lakah a tlawm a, a chak loh rualin tennis inelna a chawlhsan thu a nemnghet a, a khelmual chhuahsan tur chu mipuiin ‘standing ovation’ pein an thlahliam.
US Open champion hlui Thiem-a chuan kum 31 mi lek ni chunga professional tennis chawlhsan chu a na ngaih ngaih hle tih sawi chungin a thutlukna siam chu a dik ngei nia a ngaih thu a tarlang tel.
He Austrian pa hian a home tournament a khelh zawh rual ruala chawlh ve tawh a tum thu karliamta khan a lo sawilawk tawh a, first round-ah 7-6 (8-6) 6-2-in world number 42 Darderi chuan a vaw tla a, a lo sawilawk tawh ang ngeiin a chawl zui ta a ni.
A vanglaia world number three hian lo han hawlh ve tawh Thiem hian kum 2019 khan Vienna title hi a lo la ve tawh a; a career-ah ATP Tour level title 17 la tlingin, kum 2018 leh 2019 khan French Open finalist a ni a, kum 2020 Australian Open final-ah tlawmin runner-up a ni bawk.
Major tournament a lak baka a inchhuanna lian dang leh ni thei chu ‘Big Three’ an tih mai – Roger Federer, Rafael Nadal leh Novak Djokovic-te laka hnehna a chang kim vek kha a ni ang.
New York trophy a lak atanga kum khat liam hmain Thiem hian a banrek a tina a, thla 10 chhung teh meuh tour-ah a inlan thei lo a, chutih chhung chuan ranking lamah pawh a tlahniam hman hle a, top 350 lamah a tawlhchhuak hman!
Nikum khan top 100 huangah kirleh mah se a game khelh dan tha ber kha a pha tak tak thei ta lo a, kumin May thla khan tun season kal lai tawp ruala a chawlh tur thu a puang ta a ni.