Thil man tih toah chuan sawrkar kal tawhte min mawhpuh ngam lo – John Rotluangliana
Thil man tih toah chuan sawrkar
kal tawhte min mawhpuh ngam lo
– John Rotluangliana
ZPM chuan thil dangah sawrkar kal tawhte tih dan an mawhpuh thin laiin, thil man tih toah chuan an mawhpuh ngam lo tih MPCC vice president John Roltuangliana chuan a sawi.
Dampa bial by-election neih tura Congress candidate John Roltuangliana leh MPCC hruaitu dangte chu Thawhlehni khan W Phailengah Dampa Central Block Congress hotute nen an inkawm a. Congress candidate hian, by-election chu ruling chan a ni thin a, a kum hnihna phei chu ruling vung lai tak a nih thin laiin, tunah chuan ZPM chhiat lai berin an inthlang dawn tih a sawi.
ZPM candidate-in Block angin project an siam tur thu a sawi chu John Rotluangliana hian sawi chhawngin, “MLA leh minister ka lo ni ve tawh thin a, chutianga project an siam ka hre ngai lo. Amah in thlantlin chuan engmah nihna nih tur a nei tawh lo, ‘MLA MR’ bak a ni thei tawh lo,” a ti. MNF pawhin Mizoram mipui lakah ba an nei a, SEDP cheng nuai thum an la bat sak tih a sawi bawk.
MPCC senior vice president Lalnunmawia Chuaungo chuan, ZPM-in thil tha tinreng an tiam a, an campaign thiam hle a. An thli pawh a tleh nasa a, hneh takin thlantlin an ni tih a sawi. “Kum khat leh a chanve an sawrkar hnu hian, mite beisei an pha lo hle. Tunah hian Mizoram mipuiin kan lam an lo hawi tan tawh a. Dampa inthlanah hian ZPM thli a tleh tawh lo, an huphurhawm tawh lo a ni tih helai kan rawn thleng a, kan hmu a ni,” a ti.
MPCC adviser Zodintluanga pawhin ZPM sawrkarah hian thil thleng mak tak a awm tih sawiin, Assembly-a Committee sang ber, speaker chairn-na hnuaiah General Purpose Committee a awm a. Chutah chuan chief minister, oposition leader leh ZPM MLA pali panga an tel a, an thurel chu cabinet-in a hnawl tih a sawi.
“He Committee hi mini Assembly an ti a, an thurel an hnawl ngai lo. Mahse cabinet-in a hnawl a, hei hi thil zahthlak tak a tling. Chief minister rintawk lohna, no-confidence motion pulut ang an ni. ZPM hi an bilh a la tho loa, insiamthat an mamawh em em. Helaia ZPM member-te pawhin insiamtha tur leh la sawrkar zel tura in duh a nih chuan Congress candidate min lo vote pui rawh u,” a ti.