Minister-in loneitute tan an huan/lo panna kawng tha ngaihtuahpui turin centre ngen
Minister-in loneitute tan an huan/lo panna
kawng tha ngaihtuahpui turin centre ngen
Ni hnih awh tur National Conference on Agriculture: Rabi Campaign 2025 chu Thawhlehni atang khan New Delhi-ah tan a ni a. Mizoram atangin Agriculture & Farmers’ Welfare minister PC Vanlalruata leh department hotu dangte an tel.
Sawrkar laipuia Ministry of Agriculture & Farmers’ Welfare chuan conference hi a huaihawt a, state hrang hranga agriculture minister sawm an ni. Nakum Rabi season inpuahchahna atana hman a ni a, hmalak dan tur sawiho a ni.
Minister PC Vanlalruata chuan Mizoram-a agriculture sector-in a mamawh ber chu farm road tha a ni, tiin, tlang ram kan nih avangin, inkalpawh zung zung a har a. Fur ruahtui a tam chang phei chuan lei a min nasa thin a, loneitute tan harsatna tam tak a thlen thin a. Farm road tha zawk kan neih theihnan sawrkar laipui tanpuina an mamawh tih a sawi.
Cocoa chu Mizoram leilung nen a inmil em em a, loneitute sum lakluh a tam deuh deuh theihnan, oil palm leh tung nen cocoa inter-cropping tura hma lak an tum tih a sawi a. Hetiang atan hian cocoa seedling quality tha tak a ngai dawn a, Mizoramah ngei ICAR nen tangdunin nursery bun theih nise, tiin sawrkar laipui thawhpuiah a sawm a ni.
“Tlangrama cheng kan nih avangin central scheme tam tak hi a nihna ang taka kalpui a harsa thin. Chuvangin, kan leilung leh sik leh sa mila Mizoram tan bik scheme duan a tul a. Chutiang tur chuan central puihna kan mamawh a ni,” minister hian a ti.
Conference-a minister thusawi dang:
8 Tunah Mizoramah hectare 8175-a zauah wet rice cultivation (WRC) kalpui a ni a, WRC atana la hman theih tur, potential area hectare 1,39,372 a la awm.
8 National Mission on Edible Oils – Oil Palm scheme hnuaiah hma lak a ni a, oil palm hi Mizoram-ah a tha duh em em a, farm road neih that tawk loh vangin a chingtuten harsatna an tawk.
8 National Mission on Edible Oils – Oilseeds hnuaiah Rapeseed leh Niger-ah hma an la a; Rapeseed hi a chi (seedling) quintal 3.76 sem a ni tawh a, Niger chi quintal 10 sem a ni a. Tunah hian district hrang hrangah block demonstration neih mek a ni.
8 Tungah state sawrkarin tan a la mek a. Tung chin tih larna atan action plan cheng nuai 399.37 sanction a awm tawh a, chak zawka hmalak a nih theihnan NMEO- Oilseeds scheme hnuaiah tung hi telh ve theih nise tiin Union Agriculture minister a ngen. Tunah hian Saitual, Khawzawl leh Serchhip district-a chhungkaw 331-in tung hi an ching mek a, kum 3-4 chhoah chuan a rah tan beisei a ni.
8 National Food Security & Nutrition Mission hnuaiah field pea leh rajmah bikah cluster demonstration tih mek a ni a; rice-pulse cropping kalpui niin, thlai chi quintal 24.90 sem a ni tawh. Rabi season awm turah ICAR-IIPR leh NEH nen thawk hoa hma lak tum a ni.