Thin Lizzy leh Whitesnake guitarist John Sykes a thi

Thin Lizzy leh Whitesnake guitarist John Sykes a thi
Whitesnake hla hit ‘Is This Love’ phuahtu zinga mi, an band guitarist John Sykes, kum 65, chu cancer avangin a thi. A thih thu hi niminpiah khan an Facebook page-ah an tarlang a, “Cancer avangin John Sykes-a’n mual min liamsan ta tih lungchhe takin puan a tul ta si,” tiin an tarlang.
John Sykes hi 1980s Thin Lizzy leh Whitesnake tana guitarist lo ni tawh a ni a, Whitesnake album-a hla hrang hrang phuahtu zingah telin, chung zinga hian Hot100 chart-a an group hla thleng sang ber ‘Is This Love’ pawh a tel.
Whitesnake chuan, “A mimal taka amah hrechiang lo te chuan musical talent nei tha tiin mi tam takin an hre reng tawh dawn a, mahse, ani kha mi remhria, ngilnei leh hlimthei tak niin, a awm ve tawhnaah chuan boruak tinungtu ber a ni thin,” an ti bawk.
Sykes hi 1959 khan Reading, England-ah a piang a, a tleirawl chhuah atangin guitar a tuipui a, Streetfighter band zawmin, chumi hnuah Tygers of Pan Tang a zawm leh a, mahse, band chhuahsanin 1982-ah a solo single hmasa be ‘Please Don;t Leave Me’ a tichhuak a, he hla hi Thin Lizzy member Phil Lynott nena an phuah a ni.
A hnu deuhah Thin Lizzy guitarist a ni zui ta a, an studio album hnuhnung be 1983-a an tihchhua ‘Thunder and Lightning’ ah pawh a thiam thil a thawh ve nghe nghe a ni. Thin Lizzy fan thin a nia, an band-a a tel hian kum 22 mi chauh a la ni.
1983-ah Thin Lizzy an kehdarh a, chumi hnuah Whitesnake pui lehin, 1984-a an group album ‘Slide It In’ US version-ah guitar a perh a, an studio album 1987-a an tlangzarh ‘Whitesnake’-ah guitar a perh leh bawk. He albumhi Billboard 200 chart-ah No.2 a kai a, chart-ah hian kar 76 chhung a lang thei nghe nghe a ni.
‘Is This Love’ hi Whitesnake member Coverdale nena an phuah dun niin, 1987 khan Billboard Hot 100 chart-ah No.2 a kai a, Whitesnake hlaah chua ‘Here I Go Again’ tih lohah chuan a hit bera chhal ngam a ni ang.