Thinlung taka ruihhlo hluar tuar na ber chu hmeichhiate – Lalrinpuii

Ruihhloin kan ram a tihbuaina thinlung taka tuar nasa ber chu hmeichhiate an ni tih Social Welfare minister Lalrinpuii chuan a sawi.
National Commission for Women leh Mizoram State Commission for Women tangdun buatsaih, Mizorama ruihhlo do kawnga hmeichhiate tihchak lehzual dan tur inzirtirna chu Zirtawpni khan neih a ni a. Hmanpuitu Social Welfare minister chuan, ruihhloin kan ram a tihbuai nasat zia ngaihtuahin hmeichhiate chu thinlung taka tuar nasa ber an ni tih a sawi a. Ruihhlo in a pui a pang, a hmei a pa a thliar loa, chutih rualin ruihhlo tite enkawlna kan neih chu mipa tan a nih tlangpui avangin ruihhlo ngawlvei hmeichhiate chu an langsar lo mai nia a hriat thu a sawi.
Hmeichhiate zinga ruihhlo ngai tam zel chu nawhchizawrhna tihluartu pakhat nia a hriat thu sawiin, ruihhlo do kawnga chhungkaw pawimawhna leh nuten mawhphurhna lian tak an chelh chu hre turin a chah.
He hun atana sawm bik mithiamten ruihhlo ngai hmeichhiate leh a enkawl kawnga mawhphurtute tana hriat tur pawimawh an sawi a. Damdawi lam leh pianphunga ruihhlo laka hmeichhiate chak lohna awm thei leh changtlung zawka ruihhlo ngai hmeichhiate hriselna kawnga tanpui dan turte inzirtir a ni.