Thirsakawra mel 2400 tlanin record siam

Thirsakawra mel 2400 tlanin record siam
Irish ultra-cyclist Joe Barr, kum 66, chuan Route 66-ah ni 9 chhunga mel 2,400 chuanga a thui tlanin Guinness World Record a siam. Barr chuan, “Mahni inrintawkna nun neitu ka ni a. Bul ka tan tawh chuan a tawp thleng ngei tura mahni inrintawkna ka nei thin a, chu chu ka nun kaihruaitu pawimawh a ni,” a ti.
Ireland a piang Joe Barr hi khawvel hmun hrang hranga thirsakawr intlansiak hautakah a tel tawh thin a, chutiang Oklahoma City bula a tlanna atang chuan Route 66 pawh a hmelhriat ta a, “Oklahoma City kiang lawkah tlan kawng pakhat kan mu a, Route 66 a lo ni a. Intlansiakna kawng nuam tak a nih dawn hi tih ngaihtuahnaah a lo lut nghal,” a ti.
Record siam tum hian kum hnih zenzawn a inbuatsaih a, biking route te zirchiangin, crew shift te a set fel a, crew chief Mark Poland chuan, “Kum 50 vel kalta te kha chu ni se Route 66 a tlan hi vawiin aiin a awlsam zawk ang. Chutihlai chuan he kawng hi zawhtu an awm mumal lo a, rauhsan ang deuthaw a nih lai te pawh a awm a, tunah chuan a kawng a lun ta a,” a ti.
He Route 66 hi mel 2,448 a thui niin, Chicago, Illinois atanga Santa Monica, California thleng a pawh a, 1926-a an siam niin, USA-a state pariat a tan tlang a ni.
Barr hian record siam turin ni khatah thirsakawr darkar 20 atanga 21 te a khalh a ngai thin a, “Ultra-distance cycling hautak zet mai chu a ni e,” a ti.
Barr hian a kum 66 tlin champha lawmna pakhat atan a hmang nghal a, a pianchamphaah tak Route 66-ah hian record siam tumin a tlan tan a, a support team te pawh darkar 12 danah an inthlak zak zak a ni.