Thla 18 chhungin US oil firm-te Venezuela-ah inbun thei ti
President Donald Trump-a chuan President Nicolás Maduro-a thuneihna a paih thlaksak thut hnuah US oil industry-te chuan Venezuela-ah thla 18 chhungin ‘hma an lakna tichakin hna an thawk hman dawn’ niin a sawi.
Trump-a hian NBC News hnenah ‘sum tam tak sen a ngai dawn a, oil company-te an inseng dawn a, an inseng a nih chuan keiniin kan pe leh emaw, a hlep atangin emaw an hmu let ang’ tih a sawi.
US petroleum company lian aiawhte chuan tun kar tawpah hian Trump-a sorkar hotu lawkte an hmu dawn niin CBS News-in a tar lang bawk.
Mi thiamte erawh chuan a hmaa Venezuela-in tuialhthei a thar chhuah ang zat la chhuak tur chuan dollar tluklehdingawn tel sen leh kum 10 emaw vel tal a ngaih tur thu an lo sawi tawh thung.
Trump-a’n hetiang a sawi hi Maduro-a mana an rama thubuai ngaihtuahsak tura an hruai hnu lawka US-in Venezuela chu ‘a enkawl dawn’ tih a sawi hnua a sawi a ni.
NBC hnena thla 18 chhung hun tiam a sawi hi Trump-a chuan tuialhthei thar chhuah hi ‘hei aia rei lo pawh a ni thei a, sum erawh tam tak sen ngai’ a nih tur thu a sawi.
“A man a tlawm phah dawn avangin tuialhthei thar chhuaktua Venezuela chhuah hi a tha dawn hle a ni,” tiin Trump-a chuan a sawi.
Trump-a hian tun hnaiah American oil company-ten Venezuela-a tuialhthei hmunhma a chei that theih thu a lo sawi tawh thin a. Barrel tluklehdingawn 303 vel nei nia chhut niin khawvela a ngah ber an ni a; mahse, kum 2000 chho atang khan an thar chhuak hle hret hret zel.
Trump-a sorkar hian Venezuela-a tuialhthei awm zat ngaihtuahin theihna sang tak neiin an ngai a ni.
Hetih lai hian Venezeula-a tuialhthei thar chhuah tihpui hi US firm tan a hautak a. A ritin thlitfim a harsa a, US firm zingah Chevron chauhvin a ti thei.
Chevron thupuangtu, Bill Turenne chuan an company chuan an hnathawkte himna leh thatna tur bakah an thil neih dinhmun mil zelin hma an la dawn tih an sawi a. ConocoPhillips chuan Venezuela-a thil thleng an thlir reng a, khawvel huapa nghawng a neih theih dan pawh an ngaihven reng tih an sawi.