Thla 3 chhungin TB kai hmuh 406

Thla 3 chhungin TB kai hmuh 406
Sawrkar laipuiin TB natna umbo tuma a beih meknaah ni 100 chhungin TB kai a tam thei ang ber hmuhchhuah a, enkawlna pek a kalpui mek a. Mizoramah pawh district pali ah kalpui niin, hemi chhung hian TB kai mi 406 hmuhchhuah an ni tawh. Aizawl district, a bikin Aizawl khawpuiah tunhnaiah TB kai hmuh chhuah an tam a, tih dam har multi drug resistant TB a hluar chak tih sawi a ni.
National TB Elimination Programme kalpui mekah State TB Cell hotute sawi danin, India ram atanga TB natna umbo tumnaah hian a mi cheng zat atanga chhutin TB hrik kai hmuhchhuah tamna leh TB thihpui tamna district 347 thlanchhuah a ni a, chu’ng zingah chuan Mizoram district 4 – Aizawl, Champhai, Mamit leh Serchhip a tel. Kum 2015 khan India rama mi nuai khat zelah 237-in TB an vei anga chhut a ni a, 2023-ah nuai khat zelah 195 niin, hei hi nuai khat zelah mi 47 ah tal tlak thlak tum a ni. TB thihpui hi mi nuai khat zela chhutin 2015-ah 28, 2023-ah mi 22 niin, tunah mi 3-ah tlak thlak tir tum a ni.
State TB Cell hotute sawi danin, a tirah chuan Aizawl khawpuiah TB natna hluar bikna hmun leh veng chu an sawi mai theih tham chauh a nih laiin, tunhnaiah a darh nasa a, a chhan bul pakhatah TB kai tawh damdawi ei lai, a ei hun chhung tur (thla 6) ei tluantling loa an taksa a that deuh hnua tawp san leh mai an tam vang a ni pakhat tih an sawi a. Mahni taksa hriselna hrim hrim ngaihsak tha peih lo, inentir tum ngai lo kan tam vang a ni tel bawk tih an sawi. TB damdawi ei ve zuk tawh, ei tluantling loten TB damdawi pangngaiin a tih dam theih loh – Multi Drug Resistant TB (MDR-TB) an kai duh bik a, heng mite hi chuan anmahni hnaiha awm, boruak (khuh leh a dangte) atanga an kaichhawnte pawhin MDR-TB hi an vei ve nghal mai thin tih an sawi a ni.
8 Mizorama 100 Days Campaign hmalakna district 4-ah hian TB hrik kai hlauhthawnawm deuh bituk siam a ni a, chumite chu endik an ni a, tun thlengin Aizawl district-ah zaa 38.76, Champhai district-ah zaa 84.00, Mamit district-ah zaa 51.87 leh Serchhip district-ah zaa 26.22 a ni. Mizoram pum angin mi 45575 endik tura ruahman chhinah mi 19738 (43.31%) an endik tawh.
8 100 Days Campaign hnuai bikah hian TB hrik kai 33 an hmuchhuak tawh a, chutihrualin Mizorama campaign bul tan hun, 2024 December 7 atanga kumin February 24 thleng khan TB hrik kai hrim hrim hmuhchhuah chu 406 an ni a. Aizawl district atanga hmuhchhuah an tam fal ber a, 286 niin, a dawttu Serchhip district-ah mi 92 hmuhchhuah an ni.
8 TB natna lanchhuahna tlanglawn ber pakhat chu chawlh kar hnih aia rei khuh emaw khawsik telin emaw, khak thi, rihna tlahniam, chuap lam fel lo, zan lama thlanfimin a bual, thawhah leh chaw ei tui lo te in a lang thei a. Khuh miah lo pawh TB kai an ni thei tho tih sawiin, inringhlel chuan sawrkar damdawi in enkawlah a rang lama inentir a tha tih an sawi a. Private damdawi ina in test tan pawh, a endiknaa dah tura lamsak thei agency an awm tih an sawi bawk.