Thla 5 chhungin Aizawl district-ah HIV kai 467

Sawrkar kum anga chhutin kumin April atanga August inkar, thla 5 chhung khan Aizawl district-ah HIV kai hmuh thar mi 467 an awm a, heng zinga 19 hi nu naupai lai an ni.
District AIDS Prevention and Control Committee (DAPCC) Aizawl chu an chairman, bawrhsap Er Lalhriatpuia kaihhruaiin Nilaini khan an thukhawm a. Heta report a nih danin, he thla 5 chhung hian Aizawl district-ah thisen (general) 15032 endik atangin HIV hri pai mi 448 hmuhchhuah thar an ni a. Nu naupai thisen 3584 endik atangin HIV hri pai 19 hmuh thar an awm bawk. HIV kai hmuh thar zingah kum 25-35 inkar an tam ber a, kum 14 hnuailam pawh 7 an awm.
April – August inkara HIV kai hmuh thar zingah hian inpawlna atanga kai an tam ber a. Mipa leh hmeichhia inpawlna atanga kai zaa 76.3 an ni a; mahni anpui kawp mipa kai zaa 6.4 awmin, ruihhlo ti inchiuna hriau inhman tawm atanga kai zaa 14.7 an ni. Nu leh pa atanga kai chhawng zaa 1.5 an awm a, an kaina hre mai thei lo zaa 0.8 an awm bawk.
DAPCC chuan Aizawl district-a HIV kai thar an pung zel chu engtia hmalak tur nge tih an sawiho a ni.