Thla 8 chhungin CMRF-ah cheng nuai 200+ lut hman

Sawrkar a inthlak hnu, ZPM sawrkar hnu ah thla 8 chhung vel hian Chief Minister Relief Fund-ah cheng nuai 200 chuang sum chhunkhawm a ni tawh.
Chief Minister’s Office-in a tihchhuah danin, 2023 December 18 atanga 2024 August 21 thleng khan Chief Minister Relief Fund ah mi 196 atangin Rs. 20,129,031 a lut tawh a, hemi hmaa sum awmsa (opening balance) Rs. 5,20,049 nena belhin hemi hun chhung hian Rs. 20,649,080 a tlingkhawm a ni.
A petu mi 196 hi kohhran, kohhran hnuaia pawl, sawrkar department hrang hranga pawl, zirtirtu pawl, Zoram pawna Zofate awmten pawl leh mimal anga an pek, political party, tlawmngai pawl, sumdawng pawl leh a dangte bakah mimal hminga pe te an ni. Cyclone Remal-in Mizoram a nuai hnu ah pe an pung zual nia ngaih theihin an tam zual a; a petu engemawzat pawhin he chhiatna tuartute an tinzawn nia ngaih theih a ni.
A pekchhuahna lam hi mimal, kohhran leh khawtlanga pek a ni tlangpui a, a vaiin 165 a ni. Cylcone Remal-a chhiatna tuartute hnena pek a awm rualin, a tam ber hi mi damlo harsa, khawsak harsa leh chhan dang vanga pek a ni thung.