Thla hnih chuang bo hnua South African journalist ruang hmu

Thla hnih chuang bo hnua South African journalist ruang hmu
Chanchinbumi leh a bialnu chu thla hnih chuang an chin hriat lohva a awm hnuah an ruang tawih tan tawh chu South Africa-ah chhar a ni tih tual chhung chanchinbuten an puang.
Police chuan ruang an hmuh thu leh radio journalist Sibusiso Aserie Ndlovu leh a kawppui, Zodwa Precious Mdhluli-i ruang an ni em tih erawh DNA test hmanga finfiah a la ngaih thu an sawi ve thung.
Chanchinbu pawl pahnihin thuchhuah intawm an siamah police-ten mi panga an man hnuah an chhui lai an hre chhuak thei ta tih an puang.
An pahnih hian thah an ni a, Limpopo province hmar lama ramhnuaiah an ruang hi an paih niin an sawi a. He thihna hian a barakhaihin an awih lo zawk hial niin an sawi.
February 18 atang khan an pahnih hian an chin hriat a ni lo tawh a, a thattu nia rinhlelhte chu in chhung bungrua leh an car an ruksak nia an hriatte nen man an ni tawh.
Ndlovu-a hi South Africa khawpui, Pretoria-a tual chhung radio station, Capital Live dintu a ni.
African Media & Communicators Forum (AMCF) leh National Press Club (NPC) chuan forensic team-in an pahnih ruang ngei a ni tih an finfiah tawh tih an puang.
“Na ka ti tak zet a ni. Ni tam tak bo tawh mah se beisei kan la nei a, dama hmuh leh kan la inring a. An u leh nau leh chhungkhatte kan tawrhpui tak zet a ni,” tiin AMCF chairperson Elijah Mhlanga chuan a sawi.
South Africa hi khawvela pawikhawihna thlen tamna ber pakhat niin mi tam takin an hlauh ram a tling.
Sorkarin a chhinchhiah dan chuan kum 2024 khan tualthahna 26,232 a thleng a, ni tin 72 thleng ziah ang a ni.