Thla hnih chuang lei khar ta

Mizoram leh Myanmar inkalpawhna pawimawh, Zokhawthar leh Khawmawi inkara lei chu thla hnih chuang khar a ni ta a, khawchhak lam atanga bungraw rawn lut a tlem phah.
Zokhawthar hi Champhai district-a mi a ni a, |iau kam khua a ni. An khaw lehlam Myanmar lamah Khawmawi a awm a, an inkarah |iau lui a luang. Lei a awm a, chu chu Mizoram leh Myanmar inkalpawhna kawng pawimawh, insumdawn tawnna kawng pawimawh a ni.
He lei khar chhan hi chiang faka hriat a ni lo a, India sorkar hnuaia customs department-in khar tur an tih vanga khar a ni. Khar a nih chhan leh khar tur thu hi ziakin a awm lo a, tawngkaa (verbal) tihfel a ni tih thu dawn a ni.
Zokhawthar leh Khawmawi dawh zawmtu lei hi July ni 25-ah khar tan a ni a, vawiin thlengin khar a la ni.
Lei khar a ni han tih hian, mihring inkalpawh chu phal a ni a, bungraw kaltlangpui an khap. Hei vang hian sumdawnnain a tuar a, khawchhak lam atanga Mizorama lakluh thin bungruate chu thla hnih chuang hei lei kaltlang hian lakluh theih a ni tawh lo.
Zokhawthar VC president Lalmuanpuia chuan lei khar chhan an hriat loh thu hi a sawi a, customs department lamin phone hmangin an bia a, lei khar a nih tur thu, a hun chhung pawh sawi lovin an hriattir tih a sawi.
Khawchhak lam bungrua, Mizorama lakluh hi Khawmawiah a thleng phawt a, chuta tang chuan Zokhawthar-ah thiar luh a ni thin. Chumi thiar hna leh a buaipui vel chu Khawmawi leh Zokhawthar mipuite eizawnna ber a ni a, chuvang chuan lei khar hian a nghawng hle.
Thu dawn danin, CBI-in kuhva tawlh chungchang an chhui avangin customs lam hian lei hi an khar a, eng tia rei nge an khar dawn tih te, CBI hian eng tia rei nge an chhui dawn tih te hriat a ni lo.
Tun hnaiah CBI hi Mizoramah an rawn kal fo a, kuhva tawlh chungchang hi an chhui mek. Rei tak tak awm chang te pawh an nei.