Thla hnih khapna…
Hunpui lawmna vuakvetah boruak tibawlhhlawh thei leh hriselna nghawng pawi thei heng Halpuah, Halmawi leh puak thei dangte hala intihhlim kan chin thin avangin, Krismas leh kum thar boruak a lo thianghlim a, boruak muanawm tak hnuaia hun pui kan hman theih nan district hrang hranga thuneitu District Magistrate-te chuan tun lai hian khapna thupek an chhuah chho mek a.
Tun hnai maiah pawh Saitual leh Khawzawl district chuan halpuah, halmawi leh sky lantern lakluh, zawrh leh hal phal a nih loh thu te, thupek chhuah chuan chhuah a nih atanga thla hnih chhung a huam thu te, thupek zawm lo leh bawhchhia chu Section-223 of Bharatya Nyaya Sanhita, 2023 hmanga hrem theih a nih thute an chhuah a.
Thupek chhuah ni hi October ni 16 a ni a, thupek chhuah ni atanga thla hnih chhung chu December ni 16-ah a tawp dawn tihna a ni. Khapna thupek hian a hun pawimawh lai tak Krismas leh Kumthar a huam pha dawn lo tihna a ni awm e. Tunhma, CrPC Section 144 hman rim lai kha chuan, vawikhat khapna thupek chhuahin thla hnih chhung bak a huam thei lo tih kha a ni thin a, mahse a tul dan azirin thupek ngai kha a thara tihchhuah leh mai theih erawh a ni. A boruak azirin vawikhat khapna thupek chhuahin thla ruk chhung huamtir theihna dan te pawh a awm tho niawm tak a ni.
Tunah chuan CrPC era a tawp a, Bhartiya Nyaya Sanhita (BNS)-in a rawn thlak ta a. Tuna khapna thupek pawh hi Section 223 of the Bhartiya Nyaya Sanhita (BNS), 2023 (No.45 of 2023) tih a ni ta. BNS hi chuan, dan bawhchhiate jail-a khung (imprisionment) ang kha a rawn uar ta vak lova, pawisa inchawitir lam a rawn uar ta a. Tuna khapna thupek bawhchhiatna hi cheng sangnga thleng chawi theihna a ni awm e.
Eng pawh ni se, dan lama mithiam zawk an ni a, thla hnih chhung piah lam kalpui dan tur chu an hre zawk em em ang tih a hriat a. A pawimawh ber chu, mipui hian khapna thupek kan zah lo te, kan hlau lo lutuk thinte hi, enge a chhan tih chhui chian deuh a, mipuiin dan an zaha an zawm thap thap theihna tura hma lak a pawimawh ber a. “Thupek kan chhuah tawh alawm…” tia ngaihthaa thutna nghenchhan nghenga thut-awn san mai chi a ni lo tih kan hre vek awm e. Thupek chhuah hi mipuiin an zawm tha nge zawm tha lo tih ngun taka vil zui hi a pawimawh lai tak chu a ni.
Mipui lam pawh hian khua leh tui thain a tihtur(duty) chu ‘dan zawm’ hi a ni tih kan hriat thar zel a pawimawh bawk e.