Thla hnih-khat hnu ah healthcare scheme nihna diktak a lang ang – Dr K Beichhua

Thla hnih-khat hnu ah healthcare
scheme nihna diktak a lang ang
– Dr K Beichhua
Sawrkar hotuten sawrkar hnathawk leh private hospital-te inremna an siampui thuai loh chuan thla hnih-khat hnu ah AB-PMJAY kawra rawng dang an hnawih health-care scheme hi a nihna dik tak a lang anga, sawrkar pawhin tifuh an inti kherin a rinawm loh a, buaina namen lo kan tawh ngei a ring tih BJP MLA Dr K Beichhua chuan a sawi.
BJP State office-a inkhawmah State Core Group member ni bawk Dr K Beichhua chuan, sawrkar hnathawkten facility an neih zinga security an neihna bera an ngaih chu medical reimbursement hi a ni a. Medical Attendant Rule-ah he hamthatna hi tun thlengin sawiselna leh lungawilohna engmah awm loin lawm takin an la hmang a. Chutihlaiin tun sawrkarin Mizoram Universal Health-care Scheme-a sawrkar hnathawkte barhluih an ni hi a vanduaithlak a ni, tiin, sawrkarin a ranglama chinfel sak turin a ngen tih a sawi.
Hospital empanelment chungchangah a hriat danin, state pawna empanelled 20 ho pawh hi deemed empanelled an ni chauh a, MoU ziahpui pakhatmah an awm lo tih a sawi a. State chhungah private hospital tam tak zingah damdawi in pa 6 chauhin an pawm bawk tih a sawi. MLA-te chu medical reimbursement ti thei sa an ni a, tunah hian he Scheme hnuaia thunluh tum mek an ni a, hei hi an duh dawn nge dawn lo tih a la hriat loh tih a sawi bawk.
PM Healthcare (AB-PMJAY) scheme chu kum 2018 atangin India mipui tan duansak kan ni tawh a, cheng nuai 5 thleng bill theihna niin, mi hnuaihnung zawkte tana siam a ni tih BJP MLA hian a sawi a. Hei bakah hian senior citizen, kum 70 chunglam tan siamsak an ni tih sawiin, mipui sawrkar dik tak chu BJP a nih zia a tichiang hle tih a sawi.
“Tuna Mizoram sawrkarin Universal Healthcare Scheme a tihah hian AB-PMJAY hi a laimu ah dahin, fuh ti takin a kawr rawng dangin an chei mai mai ang tih a hlauhawm. Thla hnih-khat a kal anga, AB-PMJAY kawra rawng dang kan lo hnawih Health-care Scheme hi a nihna dik tak a lang tawh anga, sawrkar pawh hian tifuh an intih kherin ka ring loa, buaina namen lo kan tawh ngei ka ring,” a ti.
Sawrkar hnathawkte, private hospital neitute nen mumal taka sawihoin harsatna kan tawh hma in ennawn leh ngei turin sawrkar a phut tih Dr K Beichhua hian a sawi a. Mipui thatna turah chuan inphahhniam a tul hnunah inphahhniamin, thuneitu zawk an nih vanga harsatna cho chhuak kher loin, stakeholders nen dawhkan khat kila mipui tan remna zawn a tul tih a sawi a ni.