Thla li chhungin a senchi um 8000 chuang man hman

Zu khapna dan hnuaia awm mek Mizoramah Excise & Narcotics Department chuan kumin thla 4 chuang hret chhungin a senchi um puitling 8000 chuang leh rakzu litre 25000 chuang an man.
Excise & Narcotics Department chhinchhiah danin, kumin January atanga May 8 thleng khan India rama siam a senchi (IMFL) um puitling 8745 an man a, a chanve um 1416 leh a quarter (ml.180) um 1020 an man.
Hemi chhung hian rakzu litre 25862.640, zu bilh lai tin 60762 an man a. Beer leh Burma um zu – BEDC engemawzat an man bawk.
Kumin January – May 8 ah tho hian END chuan heroin kg. 23.593, methamphetamine kg. 44.111, crystal meth kg.48.061 bakah ruihna atana hman damdawi mum leh a tui engemawzat an man a. Zu leh ruihhlo kaihhnawihah hian mi 2737 leh heng thil phurhna atana hman lirthei 55 man a ni.