Thla nga hnuah Marseille-in Gattuso an petchhuak

Marseille chuan thla nga chhung lek an chhawr hnuah an manager Gennaro Gattuso an ban a, Italy defender hlui hian Ligue 1 match 15 a khelhpuiah vawinga chiah Marseille a chakpui avangin an ring zo ta lo a ni.
Kum 46 mi Italian hi nikum September thla nawi lam khan French club-in an senglut a, an ban lai hian a club chhuansan leh tak chu Ligue 1 table-ah pakuana an ni mek.
Marseille head coach a nih chhung khan inelna hrang hrangah match 24 khelhpui hmanin, tah chuan vawikua chuan a team a chakpui a, a ruaitute tan pawh han rin zui zel a harsa ve bawk dawn niin a lang.
An ban hmaa a match hnuhnungber chu Pathiannia pahnihna luahtu Brest laka sikhat faia an tlawm kha niin, club thuneitute’n rawih chhunzawm zel tlakah an ngai ta lo a, thuchhuah an siamah, “Olympique de Marseille chuan Gennaro Gattuso nena kan thawhdunna a titawp ta.
“Marseille hian Gennaro leh a staff pumpui chungah special takin lawmthu a sawi a, a chhan pawh team an enkawl chhunga inpekna tak tak leh professionalism an lantir vang a ni. An hmalam huna an kal zelna turah duhsakna kan hlan e,” tiin.
Gattuso hian Marseille-ah khan tuna Villarreal boss ni ta Marcelino a thlak a, Marcelino pawh khan thla thum chhung bak France chhim lam khaw-puiah hian hna a thawk hman bik lo.
Italian player sa nghet tlet tlawt ni thin Gattuso hian player a nih laiin kum 2006 khan Italy chu World Cup-ah a champion-pui a, inkhelh a bansan hnuah coaching lam luhchilhin, AC Milan, Napoli leh Valencia a lo enkawl tawh a, khawihah mah hian hlawh-tlinna tak tak a la sualchhuak hlei thei lo.