Thla ruk hnuah meth man leh

Ruihhlo hlauhawm meth lakah Mizoram a la himah ngaih a ni a, he ruihhlo hi man tur pawh a awm vak lovah ngaih a ni. Mahse tun hnaiah engemaw zat man a ni.
Mizoram Excise & Narcotics (MEN) department-in tun hnaiah meth hi tam tham tak mai an man a, hei hi thla ruk vel hnua an man leh hmasak ber a ni.
MEN department chhinchhiahna enin, October thla thleng khan kuminah meth hi kg 122.435 an man a, November thlenga an man zat chu kg 132.629 a ni.
Thla khat chhungin kg 10.194 an man belh tihna a ni a, kg 10 hi a tam thu-ah chuan a tam tham khawp mai. Mahse MEN department lam chuan kg 10 chuang an man hi Mizoram pawna mi tur a lo ni tih an sawi.
Thla khat chhunga an man kg 10 chuang hi hmun hrang hranga mi ni lovin mi pakhat kut atanga a hlawma an man a nih avangin meth tawlh a hluar tihnaa ngaih tur a nih loh thu leh Mizorama mi tur a nih loh avangin lawmna tur a awm thu te an sawi.
Meth hi January-ah khan kg 23.220 an man a, February thla thlenga an man zat chu kg 96.485 niin, March thla thlenga an man zat chu kg 106.648 a ni. April-ah a pung leh a, chumi hnuah chuan man belh a awm ta lo vang vang a, November-ah a hlawmin an man leh a ni.
MEN department hotute chuan Mizorama meth an man hi Mizoram pawna mi tur a nih zel thu an sawi a, Mizo thalaite a la tibuai lo nia ngaih a nih thu an sawi.