Thla thum chhungin lirthei thar 7000 chuang

“Kan kawng a zau lo tih hi chu a chiang a, chu ai mah chuan traffic jam chhan hi chu lirthei pung chak lutuk hi a ni,” traffic police hotu pakhat chuan a ti a, lirthei pun dan hi traffic police te tan chuan mak tih tham a nih thu a sawi.
Tun hnai thla thum chhungin Mizoramah lirthei thar 7000 chuang a awm a, a tam ber chu Aizawl khawpuia mi a ni. Aizawl khawpuia mi lo pawh Aizawla tlan fo turah a ngaih theih bawk.
Lirthei registration number pek danah pawh a chi thar duan a ngai deuh reng a, A atanga Z thlenga a kal hnuah tunah hian AA atanga tan leh a ni. AA pawh hi a pung chak hle.
August ni 23 khan MZ- AA hman tan a ni a, tunah hian MZ- AA hi 7000 chuang a awm leh der tawh. 7400 chuang a awm tawh.
Mizoramah lirthei registration hi 1973-ah tan a ni a, a tirah chuan ZRM tih a ni; Mizorama registration tan hma hi chuan Mizoram lirtheite hi ASO tih a ni thin. ZRM hi Aizawl tan bik 001 atanga 4999 thleng a awm a, Lunglei tan bik 5000 atanga 6999 thleng a awm. Chumi hnuah a chi dang a chhuak zel a, tunah chuan MZ hman mek niin, MZ-ah hian ABC-a a kal chhuah hnuah AA atanga tan a ni.
Traffic police-te chuan lirthei a pun chak thu, Aizawlah chuan kawngin a daih loh thu an sawi thin a, lirthei a tawt hnuah a pung zel a, a pung chak telh telh emaw tih tur a ni an ti.
Lirthei pun danah hian chhungkaw khat, pahnih pathum nei an awm a, two wheeler phei chu chhungkaw pakhatin pahnih pathum an nei fur an ti.
Lirthei a tam bakah khal thiam bel lova khalh leh fimkhur lo te, dan ngai pawimawh lote an awm a, chu chu Aizawla traffic jam chhan pakhat a tling tih an sawi.
Driving license nei lo chunga lirthei khalh an awm thin a, hei hi traffic jam chhan mai ni lovin mipuite tihim lotu a ni tih sawiin, nu leh pate’n an fate fimkhurpui se an duh thu, license nei lo chu lirthei ken chhuah phal lo se an duh thu an sawi.