Thlai thar leiah pass mark tha tak hmu ah kan inngai – CM adviser

Thlai thar leiah pass mark
tha tak hmu ah kan inngai
– CM adviser
Adviser to chief minister (Hand Holding) Dr KC Lalmalsawmzauva chuan thlai thar lei chungchangah ZPM sawrkarin pass mark tha tak an hmu ah an inngai a, an pass-na division erawh mipuiin an pek turah an dah tih a sawi.
Thawhtannia ZPM office-a inkhawmah adviser to CM chuan, party mi bik sawi loin kuthnathawktute thlai thar lei kalpui a ni a, ruahman leh beisei ang diak diakin hlawhtlinna famkim chang rih lo mah se, an thutiamah erawh nghet takin an ding a, kan state-a sawrkar ding tawhah chuan an la ti tha fal hle tih a sawi.
Thlai thar leina atan District Agricultural Marketing Committee-ah sum vaibelchhe 58.08 an pechhuak tawh a, sawhthing bikah quintal 123915. 23 lei tawhin, heta tang hian sawrkarin vaibelchhe 7.5 a hmu let tawh tih a sawi. “Thlai thar leiah full mark kan hmu lo naa, pass mark tha tak kan hmu niin kan hria a, kan pass-na division erawh mipuiin min pek turah kan dah,” a ti.
Kuminah India ram hmun dangah sawhthing thar an tam avangin nasa takin a man a tlahniam a; Bangladesh buaiin hralh chhuah kawngah harsatna a siam a, Mizoram atanga phai lama phur chhuak tur lirthei an duh anga an hmu theih loh bakah sawhthing processing lamah an inpeih hman lo tih Dr KC Lalmalsawmzauva hian a sawi.
“UT kan nih atanga kum 53-naah pawh hming chherna tham thlai thar chhuah kan la nei lo hi a zahthlak a, sawhthing hi kan state hming chherna atan hman kan tum. Kumin hi market system siamfel kumah kan ngai a, Mizoram sawhthingin Cachar leh Siliguri kalpela Visakapatnam leh Delhi Mandi direct-a a thleng ve ta hi thil chhinchhiah tlak a ni,” a ti. Tunah hian Singapore-a thawn tura buaipui mek niin, reiloteah thawn chhuak theih an inbeisei tih a sawi.
Entrepreneurship hand holding-ah sawrkar chuan mi 23 hnenah loan a pe chhuak tawh tih a sawi a. PMEGP-a lut turte online portal siam that mek a nih avangin, beisei anga chakin hma an la thei lo tih a sawi. Commerce & Industry department-ah dilna a luh tam deuh avangin department dang rualin an kal ve hman lo tih a sawi bawk.