Thlai tih rona hmanrua pe

Thlai tih rona hmanrua pe
GITAM University Visakhapatnam chuan Mizoram Horticulture leh Rural Development department-in mamawh anga an hman turin ‘Hybrid Solar Dryer with Automated Temperature Controller Technology’ chu minister Prof. Lalnilawma hnenah Thawhtanni khan a hlan. GITAM University aiawha lokalte hian he thiamna hi kuthnathawktute tih hmasawnna tura hmalakna a ni a, Mizoramin hmasawnna kawng a zawh theihnan a thlawnin an pe tih an sawi.
Horticulture minister chuan Mizorama kuthnathawktute thlai thar sawngbawl nana pho ro leh rep ro nan hun, sum leh tha tam tak senral a ni thin a; Hybrid Solar Dyer Technology hmang hian heng harsatna hi sutkian theih a nih a rin thu a sawi. Horticulture department hnuaia Mission for Integrated Development of Horticulture chak zawka kalpuina tur hmanraw tangkai a nih a beisei thu a sawi bawk.
Kuthnathawktute tihhmasawn duhna avanga GITAM University leh Technology Enabling Centre (TEC) Mizoram University inpekna lawmawm a tih thu minister hian sawiin, ramin hmasawnna kawng a zawh zel theihna’n thawhho pui zelah a sawm a ni.
GITAM University aiawhin dean Prof. Raja Phani Pappu leh Mizoram sawrkar aiawhin minister Prof. Lalnilawma ten ‘Letter for Technology Transfer Understanding’ ah hming an ziahhnan a. GITAM University aiawh leh MZU aiawh an tel bawk.
DST GITAM Technology Enabling Centre mithiamte sawi danin ‘Hybrid Solar Dryer Technology’ hi an Centre-a thiamna thar 22 an duanchhuah zinga pakhat a ni a. Ni zung hmanga chak zawka thlai thar pho rona tur niin, Celsius degree 89 thlenga saa dah theih a ni. He technology hmang hian thlai pho rona – Solar Dryer Unit feet 6 bial pathum chu cheng sing ruk velin a khawr pum theih beisei a ni.