Thlanmualah thing phun runpui

Mission LiFE (Lifestyle for Environment) programme hnuaia hmalakna – ‘Ek Ped Maa Ke Naam – Plant 4 Mother’ campaign pualin Zirtawpni khan Mizoram Pollution Control Board (MPCB) leh YMA Durtlang Branch tangdun chuan Bungmual Thlanmual, Durtlangah thing phun runpui an buatsaih. Thing tiak 110 phun a ni.
‘Plant 4 Mother’ campaign-ah hian thing phun runpui hi state hrang hrangah kalpui mek a ni a. MPCB pawhin Mizoramah kumin chhung hian a tam thei ang ber thing phun a nih theih nan theihtawp an chhuah a; thing tiak semin Mizorama school leh college Eco Club ho chu thing phun turin a ngen a ni.
Zirtawpni vek khan Mizoram EIACP Hub chuan Sericulture department nen tangdunin silk pangang thing chi hrang hrang 50 vel an phun bawk.
Mission LiFE programme hi ‘environment’ humhalh leh humhim pawimawh zia inzirtirna leh chumi kawnga mitinin ke kan pen theih dan tur inkawhhmuhna a ni a. Mimal leh khawtlang anga kan nitin nunphung leh nun dan, kan chhehvel leilung nen inhnerema inthlak danglam tura inzirtirna leh inkaihhruaina a ni.