THLASIK RIM

JC.Zoremi Hmar Joute

Kan naupan lai chuan thlasik a lo thlen hian boruak kan han hîp vang vang a, “Umm…masi rim a nam,” kan ti thin. Thlasik hian rim hran a nei bik nge ni dawn ni, thlasik rim a nam kan ti mawlh a. Enga pawh chu lo ni se kan hma lawka hunpui lo thleng tur, kum tin khêl lova lo thleng thin Lal Isua Krista piancham hun kan lo hnaih leh ta hle mai.
He hunpui hian ken tel a ngah ngawt mai, fam ngai khawhar tan lunglen tizualtu, kan hmangaih kal ta te min hriat chhuahtir a, mittui tam tak sâwr chhuaktu leh, nunhlui ngaia kûr thin tan hun tawrhhlelhawm tak zawng a ni ngei e. Chuti chung chuan kum khat chhunga hun ropui leh nuam ber, a kum a tluana Tlumtea thlir taka kan lo thlir chu a ni lawi a. Lal piancham lawm tura theih tawpa kan inbuatsaih hun, a pui a pang, a lian a tê, a hmei a pa, a chiap a lâpa theihna kawng kawnga kan phût suau suau hun chu kan lo thleng leh dawn ta!
Pan lai chuan:
Kan naupan lai chuan exam hi chi thum kan nei a, first term exam, second term exam leh exam-pui a ni. Final exam kan ti ve ngai lo va, ‘exam pui’ kan ti mai a; November thla tawpah exam pui hi kan nei tlangpui a, December thla a han hawlh châng pawh awm tho mah se thla tir tê bak a hawlh meuh lo. Chuvang chuan kan zalen em em a, tlangsam a lo kuhmum a, a pàr hun hun kha Masi ni dawna kan hriat avang khan par thuai thuai se tiin kan thlir fo thin. ‘Masi a hun, tlangsam a pâr, kawr thar neih a hun e’ tih hla ngei mai kha sàin kan tui chawi kawngah te kan zai lau lau thin. Kan tan masi kha a hlu bik em em a, tunlai naupang angin nu leh pa ten kawr thar min leisak sek ve lo va, secondhand thin tur a la awm ve bawk si lo nen, kawr thar kan neih hun chu masi kha a nih mai avangin khati em ema kan nghakhlel kha a mak lo.
|hianhovin kan inkawm dùl dúl a, huan hmun rem deuh leh dai hnaiah bûk kan sa ther fur a; tûl pik bawh ên te, indo lem leh kan bûktê-a bai lem chhuan te kha kan lungkham chu an ni deuh mai a. Vawiin atan bak helhkam leh lungtuah em em kan nei lo va, zalenna zawng zawng chu kan ta vek emaw tih mai turin naktuk lungkhamna leh khawvel buaina dang khan min tibuai ve lem lo. Naupang fai nih kha kan tum lem lo va, nu leh pa thuawih nih duh em em chung khan kan awih vek thei bik lem hlei law; kan khawvelah khan keimahni chiah kan chêng a, kan khawvelah khan tah leh lungngaihna khan hmun a chang lem lo, inngam insual kan awm a nih chuan thuhran!
Khaw vawt avanga hmui rêp luat vanga Roliana nui thi súng mai te, Bâwia te hovin kum thum kal ta vela an masi kawr, tuna an chhehchhawl kawr lo ni ta, kamis pawl tial, a kilh awm tawh mang lo ha a, dul rang ruaia khawvawt pawh hre lova khawlaia an tlan pup pup mai te mitthlaah a lo lang leh a, a lunglenthlak tak meuh mai. Silipar mumal nei phak kha kan tam lo va, thlasik a nih veleha kan kezungpui kan chhuih hliam ziah mai kha tun thleng hian a chhan ka la hre lo.
Masi hlaah pawh sâp hla ngat kha an han sa a, Rosangliana’n an bûk sak chhunga ring deuha a sak, “Felis davi dad…felis davi dad rose chu a uan niau felis-i dad!” a tih te, Lalhruaia’n, “Jingle bells singul on da uain, aw huat fan ni nis chiu bed one for open self,” tih hla a sak ngei mai te pawh kha…a awmzia vawiin thleng hian ka la hre lo; a hun lai khan a satu pawh khan a awmzia an hriat bik pawh ka ring lo na a, masi hla, sâp hla ngata sa kha a ni ve mai a, tu sawisel theih va ni suh; a lunglenthlak mang tak e!
Aizawlah chuan:
Tlangsam a kuhmum leh tan ta. Kan veng ang veng dàm duka awm tan phei chuan boruak pawh a vawtin tui a hit vin leh túk tawh a, Ni luma awm a nuam leh tawh hle; TV leh Youtube lamah krismas hla kan play tan. Biak inah pawh masi hla deuh hlir kan sa tawh. Bazar lam a lûn leh tan a, a vulin a vul chûk a ni leh deuh ber tawh. Thingtlang lam unaute an la rawn bazar lo a, an rawn bazar leh tak tak chuan kan phuisui leh mup mup viau ang a, traffic pawh duhthusamin a jam leh ang, Masi ti-masitu chu bazara khah mup mup hi a ni ve tlat!
Aizawlah bik veng tin thlêr tinah kum tina kan tih dan pangngaiin secondhand bale an hawng leh chuah chuah tawh a, dawr zau deuh leh zim deuhah pawh thawmhnaw an bâng kûr leh ta nghêk nghûk mai. Mak ve deuh chu thlasik rim a’n nam hian secondhand bale hawn kan intihhmuh a, kan thing sup sup zel mai a ni. Heng te hi thlasik rim tinamtu, masi a hnai tawh tih lantirtu a ni ve a, a tha ve riau a ni.