Thlawhna chesualah Maharashtra Dy CM Pawar-a a thi

Thlawhna chesualah Maharashtra Dy CM Pawar-a a thi
Maharashtra Deputy Chief Minister Ajit Pawar-a chu Nilaini khan Baramati, Maharashtra-a an chuanna thlawhna tum tur chesualin a thi.
Thlawhnaah hian Nationalist Congress Party hruaitu telin mi panga an chuang a, amah vengtu leh a khalhtu leh thawktu pakhat nia hriat a ni.
Baramati-a Pawar-a thawhpui hnai, Kiran Gujar-a chuan damdawi ina an dahna hmun atangin, “A chuangte hi an thi vek a ni,” a ti.
Kum 66 mi, Pawar-a hi Baramati-a Zilla Parishad inthlan campaign-a hun hmang tur niin vantlang inkhawm paliah thu sawi tura inruahman a ni.
Baramati Airport Manager Shivaji Taware-a chuan, “VT SSK thlawhna hi tum a tum a, tlankawng sirah a tlan lian a, a chesual a ni,” a ti a. Thlawhna hi Learjet 45 niin Mumbai atanga thlawk a ni tih a sawi.
Baramati Airport hi mi mal enkawl thin niin tun hnai lawk khan Maharashtra Airport Development Company hnena hlan a ni.
Deputy chief minister hian Thawhlehni hma takah Mumbai-a an chenna in chhuahsanin Pune-a an khua, Baramati hi a pan a. An chetsualna hi Baramati Airport runway 11 niin zing dar 08:48 nia sawi a ni a, a kang zui bawk.
Directorate General of Civil Aviation (DGCA) chuan thlawhnaah hian Pawar-a bakah amah vengtu pahnih leh thawktu pahnih an chuang niin an sawi a, an vai hian an thi niin a sawi.
Pune Superintendent of Police Sandeep Gill-a chuan, “Damdawi inah ruang kan thlen tawh a. Thlawhna a chetsual hnu lawkah khan ruang pathum kan hmu nghal a ni,” a ti.
Pawar-a hi July 22, 1959-a Deolali Pravara khua, Ahmednagar district-a piang a ni a. A pa, Anantrao Pawar hi Mumbai (hetih hun laia Bombay tih thin)-a hriat hlawh tak, Rajkamal Studios-a thawk thin a ni a. Zirna lam erawh a pa a thih hnuah a chhunzawm lo va, Maharashtra State Board hnuaiah Secondary School Certificate (SSC) level thleng a zir a ni.
A patea, Sharad Pawar-a hnungzuiin politic-ah a inhmang hma a, kum 1982 vel khan a patea hi an state-ah chuan Congress party-a mi lian tak a ni tawh a, ani pawh kum 23 chauh niin cooperative sugar factory board-ah member atan thlan chhuah a ni.
Magarashtra deputy chief minister a nih chhungin chief minister pali – Prithviraj Chavan, Uddhav Thackeray, Eknath Shinde leh Devendra Fadnavis a hrawn hman a. Kum 2023 khan a patea party din, NCP-ah helin an party hi pahnihah an phel phah a, pakhat hi amahin hruaiin pakhat hi a patea hian a hruai zui.
NDA sorkar zawmin deputy chief minister a ni a. NCP phel hi inzawm khawm leh an tum hnai a, Pimpri Chinchwad Municipal Corporation inthlan pawh an inchuh tawm dawn a ni.
Pawar-a hian a nupui, Maharashtra minister hlui, Padamsinh Bajirao Patil-a fanu, Sunetra Pawar leh fapa pahnih, Jay Pawar leh Parth Pawar te a kalsan.
Prime Minister Narendra Modi-a chuan ‘hun lo taka Pawar-a a thi chuan a barakhaih tak zet’ tih a sawi a. “Pu Ajit Pawar-a hi mipuite hruaituy a ni a. Maharashtra mipuite tana thawk rim em em a ni,” a ti.
Union Home Minister Amit Shah-a pawhin pawi a ti tak zet tih a sawi a. “Pu Ajit Pawar-a’n Maharashtra-a mipuite tana a thawh leh inpekna hi thua sawi fiah zawh a ni lo va, a thi hi a mi mal tak pawhin ka ui em em a ni,” a ti.
Congress President Mallikarjun Kharge-a pawhin ‘hun lo taka Pawar-a thihna chuan a barakhaihin hrehawm a ti tak zet’ tih a sawi a. A chhungte, amah thlawktute a tawrhpui tak zet tih a sawi bawk.