Thlawhna chuan man tihhniam dan ngaihtuah turin MP-in ngen

Thlawhna chuan man tihhniam
dan ngaihtuah turin MP-in ngen
Rajya Sabha MP K Vanlalvena chuan Lengpui Airport leh India ram hmun dang inkara thlawhna chuan man sang bik lutuk tihniam turin Union minister a ngen.
MP hian Parliament Session neih mekah Thawhlehni khan inkhawm chawlh lai hunawlah Union minister pahnih a hmu a. Union Civil Aviation minister Kinjarapu Rammohan Naidu hnenah India ram khawpui hrang hrang atanga Lengpui Airport-a zinte thlawhna chuan man sang fal bik lutuk tih ziaawm a nih theihnan ‘Regional Connectivity Scheme’ Mizoram tana hmang ve tura dilna a thlen.
Civil Aviation minister hnenah hian Delhi to Aizawl thlawhna chuan man chu a chang chuan Delhi to Jakarta kal man aia a san thin thute, a hlat lam inang reng si Delhi to Imphal thlawh man, Delhi to Guwahati thlawh man aia Delhi to Aizawl thlawh man a sang fal bik em emte, Krismas dawn hnaiha India ram khawpui dang atanga Aizawl panna thlawhna chuan man sang fal vak zel chu tihtawp a tul thu a thlen bawk.
Rajya Sabha MP hian Union minister of Parliamentary Affairs Kiren Rijiju pawh a hmu a, South India lama Mizo thenkhatte harsatna chungchang a thlensak a ni.