Thlawhna tlaa ruang 125 finfiah, an chhungte hnenah 83 hlan

Thlawhna tlaa ruang 125 finfiah, an chhungte hnenah 83 hlan
Gujarat Home Minister Harsh Sanghavi chuan Ningana Air India thlawhna tlaa thite ruang finfiah hna thawh mek zelah mi DNA en hmangin mi 125 chu tute nge an nih an hre tawh a, heng zinga 124 chhungte bepawp tawhin ruang 83 chu an chhungte hnenah hlan a ni tawh tih a sawi.
Minister hian Thawhtanni zan khan ruang finfiahna hmun, Gandhinagar-a Forensic Science Laboratory (FSL) a tlawh a. Finfiah hna hi FSL leh National Forensic Sciences University (NFSU)-a thawktuten an thawk mek a ni.
Sanghavi-a chuan thawktute rim taka an thawhna fakin, “Ni eng emaw zat chhung chu FSL leh NFSU team hian chhum lo chat lovin an thawk a. Thawhtanni zan dar 10:58 thleng hian mi 131-te DNA hmangin tute nge an nih finfiah an ni a, paruk erawh chiang zawka hre turin civil hospital-ah thawn leh mek a ni,” a ti.
Ruangte finfiah hna thawhna hmunah hian police leh FSL hotu lianten thutchilhin zan rei tak thlengin an awmpui tih a sawi bawk.
Minister chuan team-te hian ni thum liam ta chhungin zan lamah pawh chawl lovin an thawk a, DNA hmanga finfiah hna chu a rang thei ang bera thawha an chhungte hnenah hlan thuai thuai chu an tum ber a nih thu a sawi.
Gujarat sorkar pawhin civil hospital nen thawk dunin thuneitute leh thi chhungte inkarah inhriat thiamna leh indawh tawn theihna an neih theihna turin hma a la reng bawk.
Hetih lai hian Air India thlawhna tla taa DNA hmanga thite finfiahna hna thawh mekah mi 119 finfiah tawh an nih thu Thawhtanni tlai khan Ahmedabad Civil Hospital Superintendent Dr Rakesh Joshi-a’n a sawi ve thung.
Ruang finfiah tawh 43 an kawl zinga 14 chu Nilaini tukah an chhungte an hlan theih a beisei thu a sawi a. Hun a liam zel avangin mipuite pawh an mangangin an nghakhlel a, phone call pawh an dawng nasa niin a sawi.
London pana thlawk, Boeing 787-8 Dreamliner hi Sardar Vallabhbhai Patel International Airport, Ahmedabad atanga a thlawh chhuah hnu lawkah hostel complex-ah a tla a. A chuang zinga mi 241 bakah leia lo awm mi thahnem tak an thi a, a chuang zingah hian Gujarat chief minister hlui, Vijay Rupani-a pawh a tel a ni.