Thlawptute chungah MZP lawm

Mizo Zirlai Pawl chuan Tourism director charge la tura sawrkar hnathawk pension tawh rawih nawn a nih chungchangah hma an laknaah anmahni thlawptute chungah an lawm tih an sawi.
MZP Gen. Hqrs. thuchhuak chuan, DP&AR (Civil Service Wing) in 2026 May 22-a Mizoram Tourism director charge la tura Pi R. Lalrodingi a ruatna order chhuah nawn chungchangah Mizoram sawrkarin he order hi a sut ngei theihnan, May 25-27 chhung khan Tourism directorate pisa kai tur dan a ni a. May 28 hi sawrkar chawlh a nih avangin pisa kai tur dang chhunzawm loin, hmalak zel dan tur ngaituaha thutkhawm an tum a. Pi R Lalrodingi hi director post atanga a inhnuhdawh tak avang leh sawrkarin a pawm avangin thutkhawm tum hi thulh a ni tih a sawi.
Hma an lakna thlawptu Mizoram mipui, Hnampual Zirlai Pawl hruaitu, MZP chhungkua leh College Students’ Union hruaitute chungah MZP hian lawmthu a sawi a. A bikin thlawpna thuchhuah siamtu Joint Hnampual Students’ Organisation leh Mizo Hindi Zirlai Pawl chungah lawmthu a sawi tih a sawi.
‘Hun lo la kal zel turah hetiang thil hi thleng nawn tawh lo se kan duh a. Pensioner rawih nawn emaw service extension hian thalai tam tak hna zawng mekte a dal thin avangin, hetiang system hi MZP chuan tha a ti ngai dawn loa, a dodal zel dawn a ni. Zirlai hna zawng mekte ngaihtuah chunga sawrkar hi kal turin kan ngen nghal bawk,’ a ti.