Thli leh rial thawkah in 456 chhia Kuminah in 3300 chuang tichhe ta

Tunhnaia Mizoram hmun thenkhata thli, ruah leh rial thawkah in 456 a chhia a, kumin April thla tir lama a thawh tum nen belhkhawmin in chhia hi 3395 a tling a. Mitthi pahnih leh hliam 6 an awm.Disaster Management & Rehabilitation department chhinchhiah danin, April 20, 21 leh 22 a thli, ruah leh rial thawk hi district pali – Aizawl, Kolasib, Champhai leh Khawzawlin in an tuar na bik a, in tihchhiat a nei nual. He chhiatna thlengah hian hliam pakhat awmin damdawi ina enkawl ngai a ni.
Tun thla tira a thawh tuma tuar na ber Kolasib district chu tun tumah pawh hian a tuar na ber a ni a. Chenna in 265 chhia in mipui 13976 a nghawng a, chenna in chhiaah hian Assam type in chauh ni loin concrete building pawh a tel. Kolasib khawpui bakah Thingdawl chu a tuar na zual an ni. Anganwadi Centre leh sawrkar building dang a chhe zingah a tel bawk.
Tun thla tira a thawh tuma tuar na ber dawttu Aizawl district chu tun tumah pawh a tuartu tam lamah pahnihna tho a ni a. In chhia 178 a awm. Falkawn khuaa hmeichhe pakhat chu a chenna in thli thawkin a tihchhiatnaah amah a inhliam a, State Referral Hospital-Falkawna enkawl a ni.
Champhai district-ah North Khawbung, Champhai Kahrawt leh Bungzungah chenna in chhia a awm a. Khawzawl district UPC-NEI biak in leh Tualte khuaa Presbyterian Kohhran biak in a tichhia a, chenna in 10 a chhe tel.
Kumin April thla tira thli, ruah leh rial thawkah in 2939 a awm a, luah zui tlai loha chhe vek 81 a awm. Hemi tum hian mitthi pahnih – thing tlu in a delh hlum leh tek tla in a den hlum an awm a, hliam 5 an awm.
Thawhtanni khan DM&R minister K Sapdanga chuan, kum dang zawng aiin kuminah Mizoramah rial a tla hma a, a tamin a hrawl a, chhungkaw tam takin in leh lo an chan phah tih a sawi a. Chutihlaiin kum danga thleng khat tak, chhawmdawlna sum an dawn tur angte central atangin an lo dawng kim hman a, chu chuan chak takin chhawmdawl hna a thawhtir thei tih a sawi. Chhiatna thlen atanga ni 5 chhungin DC tinah vanduaite chhawmdawlna tur an pe kim hman a. DC-te hi MP inthlan lamah an buai deuh avangin an sem chhuak kim hman loa, sawrkar laipui duhdan a khauh bawk si a, fimkhur thu ah tihsual palh an hlau ve bawk nen, mipuiin hriatthiam an ngai tih a sawi a ni.