Thlipui ‘Kong-rey’ in Taiwan ram nuai, mi pakhat boral tawh

Thlipui ‘Kong-rey’ in Taiwan ram nuai, mi pakhat boral tawh
Kum 30 chuang hnua Taiwan rama thlipui thawk na ber nia sawi ‘Kong-rey’ chuan Taiwan ram nuaiin, mi pakhatin nunna a chan tawh thu sawi a ni.
Nimin, ningani khan an ram sanaa chawhnu dar 1:30 velah thlipui hi thawk tanin, ruahtui tam tak a keng tel a. Sorkar chuan an ram pumah nimin atang khan inven lawkna turin zirna in bakah supermarket te a lo khar hman vek a ni.
Thlawhna leh Lawng tam tak chu din tir an ni bawk a, nimina thlipui a thawh hnu hian mi 70 chuangin hliam an tuar tawh nia sawiin, hmeichhe pakhat kum 56 mi chu thingzar tlain a chuanna lirthei a delh avangin a boral niin sawi a ni bawk.
Thlipui a thlen hnu hian power supply a khaihlak nghal avangin nunphung a buai hle a, an ramchhung thuneitute chuan tun ang huna thlipui lo thleng chu mak an tih thu sawiin, kumdangah chuan hetiang thlipui hi a tlangpuiin July leh September inkarah an dawng thin niin an sawi.
Taiwan president Lai Ching-te chuan nimin vek khan thlipui tleh chungchangah ram mipuite chu an himna atana in lama awm rih turin a ngen nghal bawk.