Thluak tana thil tha

Thluak tana thil tha
Kan taksa landan kan ngaipawimawh a, exercise te kan la thin, mahse, kan thluak hriselna lam erawh chuti takin kan ngaituah ngai lo a, thluak tihchak dan pawh kan ngaihtuah lem lo. Kan nitin khawsak phunga chindan hrisel kan neih hian kan taksa mai bakah thluak tana thil tha ti kan lo ni reng. Tun tumah hian Times of India health section-in thluak tana thil tha ni a an sawi te kan rawn tarlang e.
1. Awm awl bansan la, exercise la tha rawh. Ke kal emaw, tui hleuh emaw, aerobics emaw a tha vek, chutiang kum kum 35 vel i tlin tawh phei chuan tih ngei tur a ni a, chu chuan i thil hriatreng theihna a tichak ang a, kum upat avanga haihawt risk a tihniam ang. Exercise chu regular taka lak tur a ni.
2. Thluak sawizawi rawh. Thluak hman ngaihna chi, thil ngaihtuah deuh chet chet ngai game te khel tam rawh. Crosswords thai te pawh a tha khawp mai, kum 40 tlin tawh phei chuan chess game khelh te a tha a, lehkha chhiar tam te pawh a tha. Thluak sawizawi theihna game chi hrang hrang te khelh a tha hle a, hei hian kum upat avanga haihawt risk a tihniam thei.
3. Ei leh in pawh a pawimawh. Sathau mawm, thlum leh hmuihmer te ei tlem la, theirah leh thlai rawng chi hrang hrang ei tam la, chu chuan i thluak a tichak ang a, i taksa tan pawh hriselna a ni ang a, cancer, diabetes leh lung lam natna chi hrang hrang risk a tihniam ang.
4. Rilru tihhah vak vak chin loh tur. Kan ngaihtuah chiam avanga kan tih that theih leh tihdanglam theih ni chuang lo avanga rilru kan tihhah vak vak thluak kan tihah a, thluak tichhe thei hormone kan tichhuak thin.
5. Mu tha rawh. Thluak tichat tur chuan kan taksa mamawh tawk muthilh a ngai, chhun mut lam a ni lo va, zan khawthim laia mut tur a ni. Tui taka kan muthilh hian kan thluak a in-recharge a, a lo chak thar leh thin a, ngaihtuahna pawh a fim bik thin.
6. Antioxidant pai tam chaw ei tam rawh. Mithiam ten zirchianna hrang hrang an neih tawh atanga an hmuh danin antioxidant pai tam chi chaw kan ei tam hian kum upat avanga thil kan hriat theihna, chhinchhiah theihna leh zir thiamtheihna lo tlahniam tur a veng thei. Antioxidant hoi bluberries, grape duk chi leh theibuhfai-ah te a tam hle.
7. Omega-3 fatty acid awmna chaw ei tam rawh. Omega-3 hian kum upat vanga thluak chak lo tur a veng nasa hle a, dam chhunga thluak chak tha tak kan neih theih nan a pawimawh hle. Omega-3 sangha, a bik takin lui tui thianghlim sangha- tuna, sardines leh mackerel-ah te tam a, khawkherh leh almond-ah te pawh a tam hle.
8. Rual pawl la, khawtlangah inhmang rawh. Hnathawhna hmun piah lamah thian dang neiin titi ho fo te a tha a, chhungte nen intlawh tawn a, titi khawm te a tha. Mahni ina tawm chawrh chawrh loh tur a ni. |hian kan kawm a, kan titi a, kan ngaihdan te kan sawichhuah ve hian kan thluak a tichak thin. Midang nena minute 10 titi dun ringawt pawh hi thluak sawizawina tha tak a ni a, crossword puzzle thai nen a tluk reng niin an sawi.