Daily Newspaper

Kawppui te nena inhauh zawha tihloh tur

29

Inhnial leh inhauh, inkhak ve deuh zeuh zeuh te kawppui te nena kan inlaichinnaah a thleng ve fo. Kawppui te mai bakah kan unau, kan chhungte leh kan thiante nen pawh hetiang boruak hi kan nei fo, pumpelh theih a ni bik lo.

Relationship lama mithiam te chuan hetianga inhauh chang kan nei te hi kan inlaichinna tinghettu zawk niin an sawi tlat mai. Kawppui te nena kan inkara boruak tek deuh sek sek te pawh vawng nungtuah a tang zawk hlauh thei a, kawppui te nan hetianga inkhak deuh chang neih hi inlaichinna atan a tha zawk e an ti tlat. Engpawh ni se kan rilru inan lohna te, kan ngaihdan inpersan dan te chu kan chinfel zel a pawimawh.

Kan inhnial a, kan inhau a, kan inkhak a, thinrim taka kan inan khum chang te pawh a awm ang, mahse, chung boruak chu a daih hnua tihchhunzawm loh tur leh ngaihtuah chhunzawm loh atana tha zawk a awm niin mithiam ten an sawi a, kan rawn tarlang e.

1. I rilru a dam lo a nih chuan lungawi anga lan a tul chuang lo. In inkar chu chinfel ngei tum tur a ni a, mahse, dam lo chung dam anga lan erawh tih loh tur. Kan inhnialna boruak a sosan phei chuan a hnua boruak tha siam leh pawh a sak deuh talh ang. Mahse, a tam zawk hi chuan lungawi vak lo chung pawha lungawi anga lan kan tum thin a, boruak pawh a pangngai anga lantir kan tum a, hei hi midang tana kan tih emaw keimahni tana tha zawk tura kan ngaih vang emaw a ni thei. Mahse, mithiam te chuan lungawi lo pui lungawi anga lan hian khuareiah rah tha lo zawk a nei thei niin an sawi. Lungawi si lo lungawi angin kan lang a, kan chhungril a dam chuang si lo a, chhungrilah a inup a, a inmunga, a puak chhuak leh nge nge thin a, a puak leh chu a hma aiin a na tawh thin.

2. Inrem leh tuma hmanhmawh chung chung a ngai chuang lo, inrem leh thuai chu a tha ber a, mahse, chumi kan duh avanga kan kawppui te kan nawr nasat chuan boruak kan tichhe leh zawk hlauh thei. Kawppui te chu inbengdai turin hun pek thiam tur a ni a, a ngaihtuahna te sengin, puitling takin in buaina te a chinfel theih zawk ang. Kan inhnialna leh inhauhna tam zawk thawklehkhata fel nghal duak thei a ni lem lo, boruak tha nei leh tur pawhin hun a duh ve deuh thin. I kawppui chu a thin a chhe zawk a nih phei chuan a inbengdaih hun te nghak hram hram thei la, chu chuan in inlaichinnaah rah tha zawk a chhuah ngei ngei ang.

3. In inhauhna chhan kha ngaihtuah zui suh. Mi tam zawkin kan tihsual thin chu kan inhauhna chhan ber kha kan ngaihtuah zui leh vak thin a, hei hian kan boruak a tichhe zual ting thei a ni. Kan inhauh zawh tawh hnuah eng nge kan inhauhna chhan kha tiin kan ngaihtuah leh a, chu chu thil tha deuh niawm taka lang a ni nain, inlaichhinnah a tha tlat lo, kawppui te nena inhriatthiam lohna boruak chawk tho leh theitu a ni zawk tlat.

(THE AIZAWL POST – Phuah Pawlh)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy