Thuamchhawm kaihhnawihah kum khatah mi 6,450 thi
Thuamchhawm kaihhnawihah kum khatah mi 6,450 thi
National Crime Records Bureau (NCRB)-in a chhinchhiah danin kum 2022 chhungin India-ah mo thuamchhawm kaihhnawiha thihna 6,450 a thleng.
Tun hnaiah Greater Noida-ah kum 28 mi, Nikki Bhati-i chu a pasal leh a mona chhungkuain thuamchhawm kaihhnawihah an hal nia sawi a darh hnuah ram pumah ngaihven a hlawh a, hetiang avanga thihna thleng thin ngaimawhna thawm pawh a ring hle.
Bhati-i chunga thihna thleng hian Indian khawtlanga thuamchhawm dan rawng tak sawisel a hlawhtir nasa thar a. Chhinchhiahna thar ber, kum 2022-a mi pawh nasa taka thehdarh a ni.
Kum 2022-a thuamchhawm thil vel avanga thihna hi a hma kumte ai chuan a tlawm tawh ngei a, kum 2017 leh 2022 inkar hian thihna 7,000 vel kum tin thleng ziah angin NCRB-in ‘Crime in India’ a tihchhuahah tar lan a ni a. Dowry Prohibition Act, 1961 hmangin thuamchhawm kaihhnawiha tharum thawh khapna chuan awmzia a la nei thui lo tih a lang.
Chhinchhiahnaah chuan kum 2022 chhungin Uttar Pradesh chu hetiang avanga thihna thleng a tam ber a, mi 2,218 an thi a. Bihar-ah 1,057 leh Madhya Pradesh-ah 518 a thleng.
Chhim lam state-ah 442 thiin Karnataka-ah 167, Telangana-ah 137, Tamil Nadu-ah 29 leh Kerala-ah 11 a ni a. Dowry Prohibition Act tlawhchhanin kum 2022-ah hian thubuai 13,479 ziah luh a ni bawk.
Thubuai ziah luh tam mah se thu rel fel tak erawh a tlem rih hle a, chhui chhung a reiin finfiahna tha a awm loh thin avangin hremna inpek a har hle a. Kum 2022-ah pawh hian thihna thleng 359-a thubuai siam chu finfiahna tha tawk awm lo avangin tihtawp a ni a, thubuai panga chu agency dang chhui tura tih niin thubuai 4,148 chauh charge sheet siam a ni.
Thuamchhawm kaihhnawiha thihna thlenga hmeichhiate tana ding thin, Advocate Abha Singh-i chuan heng thilah hian pasalte chauh ni lovin an mona chhungkuate pawh an inhnamhnawih nasa thin niin a sawi.
Singh-i chuan thuamchhawm phutna hi nunphunga sual nia sawiin a phuttute hi man ngei tur niin a ngai a. “NCRB-in a chhinchhiahah kum khat chhungin mo 6,450 vel an thi ziah a. Dan hmang pawha kan titawp thei lo a nih chuan kan khawtlang nuna sual a ni tihna a ni mai. A phuttu chu man zel tur a ni,” a ti.
Tun hnaia thuamchhawm avanga mote thihna thu darh hluai phahna, Bhati-i hi makeup artist leh entrepreneur niin kum 2016 atang khan Vipin Bhati-a nen an innei a. A pasal leh a chhungten thuamchhawm an phut ang a pek theih loh avangin an tihduhdah hle thin nia sawi a ni.
An inneih hnu lawk atangin an phut nghal a, Scorpio car, bullet motorcycle leh Rs nuai 35 an phut nia sawi a ni a. Hengte hi a tihsak vek hnuah pawh an la phut belh zel a, a chhungte chuan a pasal hian a hlawh hi a dil char char thin niin an sawi.
August 21 khan a beauty parlour hawn thar leh a tum chungchangah a pasal nen hian inhnial thinrimin a pasal hian a hal ta a. Bhati-i hi a taksa 70% vel kangin damdawi in panpui ni mah se a thi zui.
Police-in thubuai ziak lutin a pasal, Bhati-a leh a nu, Daya Bhati, a pasala unaupa, Rohit Bhati leh a pa man an ni tawh a, tualthata puh an ni.
Police-in an chhuinaah chuan Bhati-a hian a nupuiin hna thawka Instagram-a reels a siam thin chu a duh lo va. An inhnial thinrimin thil kang duh tak tui leihin a hal ta a. Bhati-i laizawn, an chhungkuaa mo ve tho, Kanchan-i chuan thil thleng video lo la fuhin a u pasal leh a chhungte hian a laizawn hi thah tumin an ruahman sa niin a sawi.
Bhati-a hi tlanchhiain a kea kah a nih hnuah man a ni a. Uttar Pradesh Women’s Commission chuan na taka hrem an phut a, chief minister pawhin chhui chhuaka na taka dan bawhchhia hrem turin a ti.