Thuawihna

A hmasain, The Aizawl Post chhiartute kumthar chibai u le. He kumthar 2025 hian hmuingilna leh hlimna thlen theuh che u rawh se.
Kum thar 2025 kan lo chuangkai leh ta a, hun kal tawh chu kal tawh ni se, koh kir leh theih a ni tawh lo va, kan hma lam hun atana rilru leh ngaihtuahna kan sawrbing a pawimawh leh ber dawn ta. Kum a thar angin sawrkar, kohhran, pawl, chhungkua leh mimal ten, kumthar atan inhlan tharna leh kumthar thutiamte kan nei leh sap sap ngei ang a, chuta tana pawimawh ber tur chu ‘Thuawihna’ a ni leh ngei ang.
Mizote hian thu kan awih thei viau mai a, hruai pawh kan nuam viau niin sawi a ni thin a, chu chu a taka hmuh tur pawh tam tak a awm; sawi vek sen a ni lo ang. Chutih laiin, nghet deuh maia thu kan awih theih lohna pakhat (pakhat chauh ni chuang lovin) a awm ve tlat mai a, chu chu kumhlui thlahna leh kumthar lawmna atana sawrkar phal loh halpuah leh halmawi chungchangah hian a ni; hemi chungchang hi chu kan hmuh leh hriat vek a nih avangin sawifiah hranpa a ngai lo.
Thuneihna lek kawh turin mipuiin aiawh kan thlang a, mipui aiawhte chuan mipui tan ro an rel a, an rorel anga awm (thuawih) chu mipui bat a ni.
Mipui hian, kan aiawha rorel tura kan thlanchhuahte rorel pawm duh lovin an thu awih duh lo tlat zel mai ila, aiawh thlan chu a sawtna leh a thatna a awm dawn miah lo tihna a ni.
Tun tum kumhlui thlah zanah pawh khan, a huhova dan bawhchhiatna nasa tak a thleng leh a, mahse kum hmasa aiin a nep deuh. Hei hi thawklehkhata fihlim duak thei a ni lo tih chu a lang thei a; hmasawnna rate han en hian, hma lam hun erawh a êng hle niin a lang. Tun atanga kum 4/5 hnuah chuan kumthar hmuahna hlimawm tak thil thar tha tak a chhuah ngei a beisei theih awm e.
Nikum kum tawp lama Tuirial Airfield venga thil thleng, rinhlelh indawpna avanga nunna channa khawpa thil a thleng pawh kha a huhova dan bawhchhiatnaah a puh theih bawk awm e. Midang chungthu rel tura thuneihna nei lo ten thihna thlen theihna khawpa rorelna an lo kalpui mai kha, Danin tih tur a tih an zawm loh (thuawihlona) vang bawk a ni a tih theih ang.
Hriat chian sa ngawih ngawih, Indira Gandhi kaphlumtute ngei ngei pawh kha, Court-in thihna khawpa an chungthu a rel chhung kha kum 4 chuang daih a ni.