THUHRILTU DERTE NIHNA

Rev Dr Ramengliana
“Zawlnei derte lakah fimkhur rawh u; chung chu beram vun sinin in hnenah an lo kal thin; an chhung lamah erawh chuan chinghne koham tak an ni si a.” Matthaia 7:15
Kan Mizo Bible chuan Thuthlung Thara thlarau thilpek hrang hrang dawngtu list-ah khan Sap tawnga ‘prophets’ tih kha ‘thuhriltu’ tiin a dah mai a. Zawlneite kha thu an hril nasat em avang leh an hnathawh ber a nih avang khan ‘A dik lo’ tih ngam rual a ni lo. Chutih laiin tunlaia ‘zawlnei’ tih tawngkam kan hriat thiam dan leh ‘thuhriltu’ kan han tih mai hi chu a hrang deuh a. Han ngaihtuah chian erawh chuan danglam thei em em chu an ni lo tih a lang mai. Pathian thu an hriat mite hrilhtu an ni miau a.
Mi tam zawkin ‘zawlnei’ kan tih hian hun lo thleng tur hre lawk thei lam hi kan kawh tir deuh a. Heti lama ‘zawlnei’ nih inchhal hi tu tu emaw chu la awm mah se mite beng a rawng a lut vak tawh lo ni tur a ni. Ngaih khata ngaih chi deuh pawh an ni ang. Amaherawhchu, Pathian thu hriltu, Pathian thu an hriat tlangaupuitu chu kan tam hle. Zawlnei der, ‘thuhriltu der’ tih mai theih tur awm tak tak pawh tunlai khawvelah hi chuan an kat nuk a ni ber e. Thu dik lo mite an zirtir palh ang tih hlau map lo va duh duh an han sawi mai hi chu mak angreng tak chu a ni.
Zawlnei der chungchang a vei nghal
Isua khan a rawngbawl tirhin zawlnei der chungchang a sawi nghal mai khan rilru a tithui hle. Thuthlung Hluiah an tam a, Thuthlung Thar kohhran tiak tirah pawh khan an awm nghal mai bawk. An hnawk hle a, Kohhran tan invenna tur pawimawh tak a ni. Pathian rawngbawlna hmachhuana mahni hmasialtu mi hlauhawm tak an ni.
Thuhriltu der, Pathian thutak pel hreta mi ngaihthlak duhzawnga sawi thin vawiinah pawh an lo tam ta. An thu leh hla ngaihvena phi cheng an awm ve bawk zel bawk nen. Ngaithla duhtu an tam poh leh Pathianin mal a sawm emaw an ti mai thin bawk a. An zirtirnate hi Bible atanga teh leh Pathian thu kalhmang dik atanga chhut thiam a ngai thin. Chutianga ti thei tur chuan Kohhran hruaitute tan an lak a, mipui pawhin an kaihhruaina kan zawm thiam a ngai ang.
Zawlnei derte hian kan chak lohna ruamah chiah hian min rawn su thin a. A then chuan kan sualna pawmzam theih dan min zawnpui a, a thenin hausak kawngin min thlem a, a then thung chuan taksa hriselna te pawh an tawktarh thin a nih hi. |awngkam thiam hmang tangkai leh ‘thlarau mi’ nih changchawiin mi hneh an tum bawk a. Mi tam takah an hlawhtling thin a ni.
Chinghne koham beram vun sin
Lal Isua hian thuhriltu derte sawi nan tawngkam dengkhawng tak ‘chinghne koham’ tih a hmang ngat a. A lawm lohzia a lang chiang awm e. Pawi sawi lo leh mi tluangtlam ve tak takte chu anmahni pumpui tihtlai nan an hmang thin. Hetiang mite lakah hian kan inveng tur a ni ang a, mi dang an bum pawh kan phal tur a ni lo. America rama theologian lar leh Kohhran hruaitu ni bawk Albert Mohler chuan, “Tunlai huna thuhriltu derte hi en liam mai mai a kan ngai theih viau chuan Kohhran hian a rinawmna a hloh dawn a ni,” a ti hial.
Eng vangin nge miin Pathian thu tak pangngai aia thu mak danglam leh herh deuh tak sawi an chak tlat thin? A chhan langsar tak chu lar leh mi ngaihsan nih an duh vang a ni ngei ang. Inzir peih sela chuan Bible leh Pathian kohhrante zirtirna hi chu hai mai theih loh tur khawpin a chiang. Mi hmuh loh hmu pha, mi chan phak loh chang phaa inngaiin, chutiang hmanga mi hneh an tum thin, chapona chi khat a nihzia pawh a lang reng a ni.
Chutih laiin mipui pawh seh nuam tak kan ni ve tho a. Kan hlimpui tur leh kan pawm thiam zawng kan ngai ‘thlarau’ hma lutuk leh zirtirna dik zawng lova tuna kan ‘thatpui’ tur nia kan hriat leh ‘boruak thar’ neih kan um nasat lutukna te hi zawlnei der tan lei tha a ni. Beram vun sinin an rawn lang thin tih hriain kan Lalpa min chah ang hian i fimkhur hle teh ang u. Zirtirna dik lo kal tlangin Pathian duhzawng hriain a zawm theih loh tih kan vawng tlat tur a ni ang.
Seh tur zawng tana veh nuam
Kan Lalpa khan tha awm taka lang, an thiltum bawlhhlawh hle si ho hi a haw viau a ni. An hlauhawmzia a hmuh reng vang a ni. Hetiang mi khawiah pawh an awm thin hi a pawi. Lal Isuan a tawngkam na ber ber, ama sawia awm lo hial nia ngaih theih dawn dawnte a hmanna te an ni. Heti taka khawsa duh thenkhat an lo awm tlat thin hian mihring sualzia a tilang a, sakhaw thila kan rilru tluangtlam hlawmzia a lantir bawk. Bumna hmang duh tan bum kan nuam takzet a ni.
Mi thahnemngai tam tak hian Pathian thu zirtir tura fimkhur a ngaihzia hi an hre fuh lo fo a. Thuhriltu lar ber zinga Rev. Dr. Vanlalnghaka min hrilh ka hriat reng chu, “Bible chang hriat thiam dan danglam deuh leh tharlam tak ka dawng a nih pawhin mi dangin an lo hrilhfiah tawh dan nen a inan leh inan loh emaw, an lo hmuh dan a kalh leh kalh loh ka fiah hmasa phawt thin,” a ti. Mi dang hmuh dan kan zah thiam tawh loh chuan chaponain min hneh hle tawh a ni thei ang.
Mizoten kan tihsual fo chhan chu kan ‘hyper-evangelical’ (thlarau bo vei uchuak) leh kan ‘hyper-spiritual’ (thlarau hnathawh uar uchuak) vang niin a lang thin a. Mi dang vei luatah hmanrua kan fimkhur zo lo fo a, ‘thlarau’ kan tum luatah kan ‘source’(thu lakna hnar) kan duhtui lo fo thin a ni. Thlarau bo hi thutaka vei tur kan ni a, Thlarau Thianghlim chuan thutak a hmang bawk thin tih vawn tlat tur a ni.
Inenfiah kan ngai theuh
Kan ramah hian Pathian thu tuichilh, thu sawi thiam leh mi dang veina thinlung tak tak nei kan thathnem viau mai hi thil lawmawm tak a ni lo thei lo. Mizo Kristianna chuan hma a sawn zel turah pawh ngai ila a dik thui hlein a rin awm. Chutih lai chuan Pathian thu sawi te hi nuam kan lo ti mah mah em? ‘Lar’ te hi kan khel nasa deuh em le? Mi hmuh phak loh hmu pha a, mi sawi ngai loh sawi te hi kan lo chak mah mah em? Hmelmapa hian hmanrua atan a hmang thei lo maw? Mi ngaihnawm tih zawngin min hruai thui mah mah thin em le? Kan ngaihnawm tih zawngte kan hmu ‘thlarau’ mah mah em?
Pathian zawlnei ‘thuhriltu’ chuan mi ngaihnawm tih, mi chawh harh, mi ngaihsan nih a khelh hmain ‘Pathian thu tak a sawi em?’ tih a infiah hmasa phawt tur a ni ang. Chu chhanna chu mahnia dawn tum mai lovin Bible zirtirna pumpui, Kohhran chanchin, ringtupuite lo dawn ve dan atangte pawhin a inthlifim thin tur ni awm tak a ni. Hmannia lawka liam ta rawngbawltu ropui tak RC Sproul chuan, “Mi pang thak lai tak hiah tum anga an mamawh nia an hriat lai tak hrilh tum kher hi Pathian thu hriltu tha lo zia a ni a. Thuthlung Hluia zawlnei derten mi an bum theih em em chhan a ni thin,” a ti. Hmelmapa hian mi hruai sual dan kawng a va ngah tak em ve aw!