Thuhriltu ropui Mane

Forward tlanchak, goal thun thei tak, a hmel ena ‘meihawl tlawn’ tia chhaih hlawh ngun ve hmel tak Sadio Mane hi player tha tak a nih tih i hre tawh mai thei. Liverpool, Bayern Munich leh Senegal tan a goal thun zat pawh i hre kilh kelh mai thei a. Thuhriltu ropui tak a ni tih erawh i la hre kher lo mai thei thung. A thusawi tha tak takte hian mi thinlung a hneh a, nun chhenfakawm nei turin mi a cho chhuak thiam riau thin.
Africa Cup of Nations (AFCON) 2021-ah Senegal champion puitu Sadio Mane hian tihian thu ropui a sawi;
“Riltam ka tuar fo tawh a, rim takin ram hna, hna hr^m tak tak ka lo thawk tawh thin. Indona rapthlak ka tuar chhuak tawh a, pheikhawk bun tur pawh nei ve lo chungin football ka lo khel fo tawh thin.
“Mite angin lehkha pawh ka zir ve phak lo. Chuti chung chuan football atanga pawisa ka lak luh hmangin kan rama tanpui ngaite ka tanpui thei a. Zirna in ka sa a, damdawi in ka sa tawh bawk. Khawsak harsa deuh deuhte tan thawmhnaw h^k tur, pheikhawk bun tur leh chaw ei tur te kan ngaihtuahsak thin.”
“Senegal rama rethei zual thenkhatte chu thla tin Euro 70 (Euro 70 hi Senegal pawisa CFA Franc chuan 46,000 zet a tling a. India pawisa chuan Rs. 5,600/- a ni thung) ka pe thin.
“In ropui tak tak neih te, car nalh leh changkang deuh deuh lei vak vak te, thlawhnaa zin kual vak vak te hi tul ka ti lem lo a. Chutiang ai chuan ka hnampuite hian ka neih ang ang min tawmpui thei se ka duh ber.” a ti.
He thu ropui a sawichhuahna hmun hi khawi hmun nge tih leh eng programme nge tih ka chiang lo. Senegal SAY feat the need programme-a a sawi a nih ka ring deuh ngawt. Senegal Roman Catholic programme-ah zawk pawh a ni mai thei a. Senegal K|P fellowship naa a sawi a ni mial thei bawk. A sawina hun leh hmun hi pawimawh erawh a ni lo. A thusawi leh a sawitu hi a pawimawh z^wk chu a ni a.
He thu a sawi hian aw ring takin ‘Rul thlahte u’ tia Pulpit a chum chiam pawh a rinawm loh a. Thawmhnaw nalh tak hain, thah thiang loh ang maia nalh a nih pawh a rinawm loh. Thawmhnaw man tl^wm zahawm tho si a hain a phun sep sep ang a. A ha var tak a lang rual leh that thin ang. Tlawm taka a nun av^ngin a zahawm a, mi dang tana luangchhuak nasa thin tak a nih av^ngin a zahawm. Evangelical speaker ni kher lo mah se, thuhriltu ropui a ni tlat thung. A nun leh thiltih hmangin thu a sawi hmasa zet a. |awngkain thu a sawi leh thin. Chutiang mi thusawi chu a ngaihawm a, mi a hneh awl bik thin.
Mane thusawi ngaihnawm bikna chu; ama tawn ngei a sawi a. Mi mittui thlemchhuah tumin thu a thluai thlum chiam lova, ril tumin a hmanhlel hek lo. Mi dangte zawm turin thu tha a sawi liam puat lo va, mi thiltha tih hmanga mi dang hmin tum lova, ama thil tha tih sawi thin a nih av^ngin Mane thusawi hi a ngaihnawmin, a ropui bik. Mane khawsazia hi kan Lal Isua duh zawng tak a nih ka ring thin.
Sadio Mane hi 10 April 1992 khan Bambali, Sédhiou, Senegal-ah a piang a. Chhungkaw khawsak harsa tak a piang leh seilian a nih tawh sa nak alaiin a pa hian kum sarih mi lek a nih laiin a boralsan leh ta zel a. An hma hun a thim leh zual phah hle.
Chhungkaw rethei tak atanga seilian ni mah se football a atchilh bur a, ke lawngin tualcharah ball a pet ve tlauh tlauh thin. Ke lawnga inkhel thin mah ni se, a tl^n chak a, a rualpui zingah a thiam ber pawl a nih zel av^ngin footballer hlawhtling a nih theih beiseina s^ng tak an nei. Football thiam tak niin, a lakah beiseina sang tak nei bawk mah se, an khawsak a harsat >m av^ngin an in atanga football zir thei ziazang a ni lo thung. Nute laka pangchang a, lungleng rual kum 15 mi lek a nih laiin an khua a chhuahsan ta tawp a, Dakar khawpuiah a pate-a te a fin ve rawih.
A pate-a te kiangah hian thawh theih ang ang thawkin a khawsa chho naw naw a, eng anga hna hautak leh hna hram thawk pawh ni se, football a zir theih phahna a nih miau vangin a vui ngai lo. School pawh lut hran chuang lovin football chu a zirlaibu a ni zui ta chawr a. A naupan zual lai chuan M’Bour tan a khel ve lauh lauh thin. Tlema a lo changkan hret hnuin Metz tan a khel ve ta, Metz jersey ha chunga a inkhelh hmasak ber tum hian Sport thuam famkim nen ngei a inthuam thlalak chu a nu hmuh atan a awt hle. Pawisa a nei lova, Phone a nei hek lova, thlalak neih chu atan vana rah ang hlauh a ni thung. Chutihlai chuan thlalatu a hmu fuh hlauh a, zah pawh sawi thei lovin a thla laksak turin a ngen ta tawp a. Thlate an inlaksak zawh hnuin thla latu hnenah chuan, “Thla min laksak hi a thlawn tur ti ro, a dik em?” tii a zawt a. Chu zawhna chuan reporter ngei pawh a tihrilhhai lettling hial zawk. Reporter chuan thlalak a thawnna tur Email ID a neih leh neih loh a zawt a, Mane’an lu a thing. Club email an inpe ve ta ngawt a!
Tuichilh ta fam chu football khawvelah a hming a chher lian chho zel. Metz tan a khelh hnu hian Austria club lian Red Bull Salzburg-in an la lut a, an tifuh hle. Red Bull Salzburg tan vawi 63 khel a, goal 31 a thun hnuin club lian zawk Southampton-in kum 2014 khan an la a. Naupang te a nih lai atanga khelh ve a chak ber thin English Premier League-ah ngei chuan a khel ve ta tak tak a. Southampton tan a khel ve ta mai hi atan chuan mumang a ang thei rum rum hial awm e.
Player thawk rim, hmasawn zel duh mi a ni bawk a, Mane hmasawnna hi a zuanin a zuang a ni ber mai. Southampton tan kum hnih chauh a khelh hnuin EPL club ropui ber pawl Liverpool-in kum 2016 khan an la lut leh ta rup. Club ropui Liverpool-ah hian a suangtuah ram zawng zawng a takin a tawng kim a, tualchhung inelna hrang hrang bakah UEFA Champions League leh FIFA Club World Cup-ah an champion zui ta hial. Liverpool- in hlawhtlinna an chan hrang hrangah hian Mane hi player tangkai leh thawhhlawk ber pawl a ni a. EPL top scorer te hial a nih b^kah Liverpool player tha berah thlan a ni tel bawk. Liverpool tan hlawhtlinna hrang hrang a chan hnuin German club lian Bayern Munich chu kum 2022 khan a zawm a. German champion Bayern Munich player a ni zui leh nghal zat.
A khelhna club tan hlawhtlinna duhawm tak tak a chan piahah an ram Senegal chu Africa Cup of Nations (AFCON) 2021 -ah a vawi khat nan a champion pui nawlh a. An ram mipuite ngainat hlawh tak a lo ni sa bawk nen Africa khawmual inelna lian berah a champion pui hnu phei hi chuan mi tam tak chuan Mane hi Pathian biakin an be lo chauh a ni.
An ram miten an hmangaih leh an ngainat, an ngaihsan leh an zah >m >m Mane hian a ram, a chhungte, an khawpui vangtlang leh tanpui ngaite tan a ban a phar reng a, englai mahin an tan kawng a khar ngai lo. Player ropui inngaitlawm, hausa chapo lo leh khawsak s^ng lo tak Sadio Mane hi hetia awm tawp pawh hian a ram mite tan chuan zirtirtu leh hruaitu ropui nih a tling.
“Liverpool tan a khelh lai khan Al Rahma Mosque -ah tawngtai turin a kal fo thin. Car man tlawm takin Mosque a pan mai thin. Tlawm takin a nung a, mi dang tan hnawksak leh hmuhhmawh turin a khawsa ngai lo”, tia Sports Bible reporter-in Mane chanchin a sawi hian ‘Thuhriltu ropui Mane’ chanchin khar ang aw.